Ministri i Ekonomisë Arben Ahmetaj i është përgjigjur akuzave të kreut të opozitës Basha sipas të cilit ministri ka favorizuar disa biznesmenë klientë të qeverisë.
Ahmetaj deklaroi se nuk ka kryer asnjë udhëtim me avion charter me biznesmen të huaj, teksa shtoi se jep dorëheqjen nëse vërtetohen akuzat e opozitës.
Sipas Ahmetajt, deklaratat e kreut të opozitës nuk janë asgjë veçse tentativa për të trembur dhe larguar investitorët e huaj.
Ja postimi i plotë i Ahmetajt në Facebook:
Nëse unë kam udhëtuar me charter me ndonjë biznesmen, përfshirë Suzer, jam gati të jap dorëheqjen. Le ta verifikojë Basha.
Por nëse kjo është gënjeshtër, ti Luli çfarë bën, je gati ta shkurtosh hundën?!
Vazhdon kalvari i budallallëqeve të nxjerra nga goja e administratorit të opozitës. Kanë hapur luftë frontale kundër investitorëve të huaj sepse i tmerron zhvillimi ekonomik i vendit. Këta kanë interes të kundërt me rritjen ekonomike siç duket. Meqë nuk ndodhi siç parashikonin skenarin grek, tani preferojnë skenarin e Pinokut!
