Durim Bami i mbijeton një atentati. Pasditen e 4 nëntorit, ai bashkë me mikun e ngushtë, i cili konsiderohet edhe krahu i djathtë, Ervin Kodra ishin duke qarkulluar me makinë në zonën e Fushë Krujës. Por pikërisht kur kanë hyrë në fshatin Tapizë, plot 13 plumba automatiku janë derdhur mbi automjetin “Range-Rover” me targa italiane, që drejtohej nga Bami.
Gazetari Elton Qyno, në artikullin e tij, shkruan se Bami ia ka dalë të shpëtojë pa asnjë gërvishtje edhe brenda makinës kanë depërtuar 6 predha, njëra prej tyre ka plagosur 35-vjeçarin Kodra. Qyno gjithashtu bën me dije se burimet me grupet hetimore është mësuar se atentatorët kanë qënë tre persona, të veshur si efektivë policie që kanë tentuar të vrasin të ashtuquajturin “i forti i Niklës”. Mesa duket ata e kishin ndjekur prej kohësh Bamin dhe lëvizjes e tij gjatë gjithë kohës në zonë. Duke e ndjekur vazhdimisht ata kishin kuptuar se duhet të qëllonin ndaj tij, teksa ai po kthehej nga një drekë në fshatin Qerek me kushëririn e tij. Rrugës për në shtëpi, makina me targa italiane “Range-Rover”, që drejtohej nga Durim Bami, është qëlluar me breshëri automatiku, plot 13 herë.
Sipas Kodrës, edhe pse në një pozicion të vështirë për të manovruar, Bami kishte mundur që të hynte në anën tjetër të rrugës, për t’u përplasur më pas me një biznes që merrej me tregtimin e mermerit. Por me rëndësi ishte që i shpëtoi atentatit. Kodra gjithashtu tregoi se atentatorët po i prisninnë hyrje të urës së Tapizës, në drejtim Kamëz-Fushë-Krujë, me një automjet Golf 5 me ngjyrë gri që ishte i ndaluar në trotuar.
Në momentin e përplasjes së makinës, si Durim Bami ashtu edhe Ervin Kodra kanë dalë nga mjeti duke u gjendur në tokë. Pasi mori lajmin për atentatin e dështuar, brenda pak minutash në vendngjarje ka shkuar me shpejtësi Valter Bami, vëllai i Durim Bamit, i cili ka dërguar në spitalin Ushtarak, Ervin Kodrën. Ndërsa Durim Bami, ashtu siç edhe deponoi vetë në Polici, ishte fshehur.
Më tej në rrëfimin e tij, Kodra ka shtuar se brenda mjetit të atentatorëve kishte fiksuar 3 persona, ku njëri ishte shofer, tjetri pasagjer dhe i treti ka qënë në sediljen e pasme. Sipas tij, personi që ka qëlluar me breshëri ka qenë njeriu që ndodhej në sediljen e pasme të makinës, i cili mbante në kokë një kapele, por ka shtuar se të tjerët nuk ka mundur që t’i fiksojë dot.
Megjithatë mbetet tashmë në “dorën” e Policisë që të zbardhë të plotë atentatin e dështuar ndaj Durim Bamit.
Por kush është Durim Bami?
I dënuar më herët për vjedhje me armë, Bami zuri titujtë kryesorë të mediave në vitin 2015, për një atentat të pretenduar nga deputeti Tom Doshi. Dosja përfundoi në prokurori, ku u zbulua dhe inskenimi. Tom Doshi, Mark Frroku dhe Durim Bami u akuzuan për kallëzim të rremë, pasi Doshi akuzoi presidentin e sotëm Ilir Meta, se i kishte porositur një atentat me një pagesë prej 500 mijë euro.
g.kosovari
