Uniformat blu të Tiranës, kanë arrestuar këtë të premte, 13 shkurt, një 34-vjeçar, i cili është shpallur në kërkim ndërkombëtar për vrasje nga Interpol Manchester, Mbretëri e Bashkuar.
Sipas njoftimit të Policisë së Shtetit, i riu me iniciale A.Sh., banues në Domje, u shpall në kërkim më 15 janar të këtij viti, pasi Gjykata e Kentit të Veriut ka caktuar ndaj tij masën e sigurisë “arrest në burg”.
Sakaq, Interpol Tirana po bashkëpunon me autoritetet britanike për ekstradimin e 34-vjeçarit në Mbretërinë e Bashkuar.
“Vijojnë operacionet e njëpasnjëshme nga Drejtoria e Forcës së Posaçme Operacionale për kapjen e personave të shpallur në kërkim ndërkombëtar. Finalizohet operacioni policor i koduar “Operacionalja 81”.
Shërbimet e Drejtorisë së Forcës së Posaçme Operacionale në Departamentin e Policisë Kriminale, në vijim të punës gjurmuese për lokalizimin dhe kapjen e personave të shpallur në kërkim ndërkombëtar, bazuar në informacionet e siguruara, organizuan dhe finalizuan operacionin policor të koduar “Operacionalja 81”. Në kuadër të operacionit, në qytetin e Tirana, u bë i mundur lokalizimi, identifikimi dhe ndalimi i personit në kërkim ndërkombëtar, shtetasit A. Sh., 34 vjeç, banues në Domje, Tiranë. Ky shtetas ishte shpallur në kërkim ndërkombëtar nga Interpol Manchester, pasi Gjykata e Kentit të Veriut në Mbretërinë e Bashkuar, më datë 15.01.2026, i ka caktuar masën e sigurisë “Arrest në burg”, për veprën penale “Vrasje”, sipas legjislacionit penal të Mbretërisë së Bashkuar.
Interpol Tirana, në bashkëpunim me autoritetet britanike, vijon procedurat për realizimin e ekstradimit drejt Mbretërisë së Bashkuar“, njoftojnë blutë.
I riu akuzohet për bashkëpunim në vrasjen e një letonezi, Vladimis Perminovs, 33-vjeç asokohe, ngjarje e cila ndodhi më 12 gusht 2025, por që i riu ndërroi jetë një ditë më pas (13 gusht 2025).
E gjithë ngjarja ndodhi në Augustine Road, Gravesend, ku 33-vjeçari u përfshi në konflikt me disa persona, duke bërë që një prej tyre të godiste me thikë Perminovs-in.
