Kandidatja e djathtë për bashkinë e Durrësit Grida Duma (Shqina) i ka rezistuar fort mbrëmë pyetjeve të gazetarëve në emisionin Opinion, rreth pjesëmarrjes ose jo në projekte ndërtimi në Durrës, në kohën kur merrej me biznesin e ndërtimeve.
Kur përballen dy kandidatë që janë marrë ose merren me biznese të ngjashme, është mëse e mundur që në një ambjent të vogël e meskin si ky shqiptar, ata të kenë patur pika takimi. Kjo mund të ketë ndodhur edhe mes dy kandidatëve të Durrësit, por nuk është kjo çeshtja më e rëndësishme. Me rëndësi është që kur flitet për tema të mëdha si menaxhimi i një qyteti-port, është mirë që të bëhet kujdes me përdorimin e akuzave, fakteve e rrethanave që lidhen me personat në garë. Grida Duma ka shumë energji për të shpenzuar në këtë fushatë, pasi e ka tashmë të garantuar historinë e suksesit. Edhe nëse humbet, ajo ka dalë e fituar në planin e vëmendjes publike, duke u kthyer në kandidaturën me më shumë gjasa për fitore, që e djathta ka mbi të majtën në këto zgjedhje.
Nga ana tjetër Vangjush Dako vjen në garë me lodhjen objektive që i kanë shkaktuar tetë vjet drejtim i qytetit, si dhe me gabimet jo të vogla që janë bërë gjatë menaxhimit prej tij, të Durrësit. Por duke ju kthyer pyetjes së fillimit, a jemi të sigurt se në këtë garë delikate ka përballë një sfidante të pafajshme dhe totalisht të pastër, e një kryebashkiak të lodhur e të korruptuar?!
