Qytetarët e mbarë vendit janë të detyruar të blejnë ujin e pijshëm jo vetëm në autobotët apo bidonët 5-6 litrosh për konsumim familjar, por edhe në lokale.
Por problematika më e madhe që vjen nga shqetësimi i qytetarëve lidhet me faktin sesa cilësor dhe i kontrolluar është ky ujë. Në shumicën e rasteve, qytetarët krijojnë varësi nga një markë e caktuar kompanie uji, jo vetëm për shkak të reklamës, por edhe emrit që u vënë shisheve. Në fakt, legjenda se iks apo ypsilon ujë mbushet në burim, nuk rezulton i vërtetë. Për më tepër, nëse ky ujë do të merrej vërtetë drejtpërdrejt nga burimi, kjo do të ishte një skandal ende më i madh.
Ligjet në fuqi përcaktojnë qartë se produktet ushqimore të konsumit në masë dhe veçanërisht uji, duhet t’i nënshtrohet një sërë analizash nga Inspektoriati Shtetëror Shëndetësor. Ky i fundit është i pa fuqishëm të kontrollojë çdo autobot legal apo ilegale që e reklamon ujin duke bërtitur në mes të lagjeve përmes altoparlantëve orë e pa orë.
Dhe për t’u kthyer te uji që merret në burim dhe që tregtohet në shishe, burime konfidenciale nga Këshilli Kombëtar i Basenit Ujëmbledhës sqarojnë për “Java”-n se asnjë kompani nuk ka të drejtë të furnizohet direkt në burim, qoftë edhe nëse kontorllohet mbi kushtet higjieno-sanitare.
Çdo kompani private është e detyruar të furnizohet nga tubacioni i Ujësjellës Kanalizimit të qarkut përkatës ku vendos të ngrejë biznesin/fabrikën e saj. Kështu, nga tubi kryesor që furnizon qytetet dhe fshatrat me ujë, kompania e licencuar krijon një degëzim me një tubacion me diametër të caktuar. Fati i këtij uji nuk dihet më pas, nëse kalon në filtra për ta bërë të dallueshëm nga ai që qytetarët marrin në rubinetët e tyre.
Nga ana tjetër, emërtimin e një burimi në etiketë ligji detyron që ta mbajë vetëm një kompani që e tregton atë të ambalazhuar. Pra nga burimi X nuk duhet të furnizohet më shumë sesa një kompani. “Java” mëson se vetëm në burimin e Selitës furnizohen rreth 11 kompani me aktivitet të tillë.
Për ta kuptuar më qartë rastin e Selitës, “Java” sjell një informacion të siguruar nga Këshilli i Basenit Ujëmbledhës, ku flitet mbi inbotiluesit me leje nga KBU.
Pranë kësaj agjencie që ka në varësi Ishëm-Erzen, kanë aplikuar për përdorim të rezervës ujore për inbotilim 9 subjekte, për të cilat është marrë edhe një vendim miratimi.
Nga këto subjekte, 6 janë të pajisura me Kontratë Koncensionare dhe leje përdorimi të miratuar nga KBU. Ndërsa 3 subjekte të tjera kanë lidhur kontrata me Ujësjellës-Kanalizime Sh.A Tiranë me afat 30-veçar.
Gjithashtu, në rastin e furnizimit të boteve me ujë, licencimi i tyre vlen vetëm për ta transportuar ujin, por jo për ta tregtuar atë.
Kohë më parë, publikisht, drejtuesit e Inspektoriatit Shtetëror Shqëndetësor janë shprehur se në rastin e boteve e kanë të pamundur pengimin e tyre dhe këtë lloj tregtie totalisht të paligjshme dhe flagrante mund ta bëjnë vetëm strukturat e policisë.
