Virozat, por edhe Covidi ka shtuar numrin e fëmijëve që i drejtohen shërbimit të pediatrisë në QSUT. Sipas Gjeorgjina Kulit, shefe e shërbimit të pediatrisë infektive, për shkak se simptomat janë të njejta ato mund të ngatërrohen.
“Kemi shtim të numrit të virozave respiratore tek fëmijët, ende vazhdojnë ato gastrointensinale dhe më pak apo më shumë me javë të ndryshme kemi edhe raste me Covid që vazhdojnë të shkaktojnë komplikacione sidomos respiratore pra të frymëmarjes tek fëmijët për të cilat detyrohemi t’i hospitalizojmë. Simptomatologjia është e njëjtë dhe nëse nuk bën ekzaminimin përkatës mund të mendosh një virozë të thjeshtë dhe të jetë një Covid apo anasjelltas.”
Covid-19 vijon të sjellë pasoja tek fëmijët dhe sidomos tek ata në muajt e parë të jetës. Fëmijët veç temperaturës shfaqin edhe problematika në frymëmarrje.
“Aktualisht kemi 7 raste të shtruara dhe po mbajme në aktivitet një pavjon të caktuar me shtretër për fëmijët që mund të vijnë edhe gjatë fundjavës. Veçanërisht janë të shtruar 6 muajt e parë të jetës. Kjo është një shenjë që tregon se pavarësisht se nënat shumica e kanë kaluar Covidin nuk kanë antikorpe të mjaftueshme për tu transmetuar fëmijëve për t’i mbrojtuar nga infeksionet e gjashtë muajve të parë të jetës. Ndoshta ky është një stimul apo një konkluzion që të rishihet vaksinimi i nënave shtatzanë ndaj këtij infeksioni.”
Një foshnje mund të rrijë në spital edhe dy javë.
“Fatmirësisht kohët e fundit nuk kemi pasur raste të rënda për tu shtruar në terapinë intensive, por në varësinë e prekjes së mushkërive apo organeve të tjera mund të qëndrojnë 10 ditë deri në dy javë. Përshëmbull një bronkopneumoni me pamjaftueshmëri të frymëmarrjes tek bebet e vogla që kërkon ndihmesë me oksigjen minimalisht qëndron 10 ditë në spital.”
Mjekët bëjnë apel për mos frekuntimin e ambjenteve të mbyllyra dhe mos dërgimin e fëmijëve në insitucione arismore kur janë të sëmurë./f.s
