Pas gjashtë faza regjistrimesh, kur kanë mbetur vetëm pak orë përpara se ato të mbyllen zyrtarisht për këtë vit akademik, rreth 1/5-a e kuotave ende rezultojnë bosh. Kjo është shifra e raportuar nga Rrjeti Akademik Shqiptar që ka krijuar portalin e klasifikimit për menaxhimin dhe koordinimin e regjistrimeve në universitete.
Drejtori i portalit të klasifikimit, Arjan Xhelaj, vë në dukje se këto janë orët e fundit për regjistrimin e maturantëve fitues të fazës së fundit. Dita e sotme shënon fundin e një procesi të aplikuar këtë vit për herë të parë dhe që zgjati gati dy muaj.
Sipas të dhënave nga ky portal, shumica e vendeve në universitetet e kryeqytetit janë plotësuar shkruan Panorama. Pjesa më e madhe e kuotave bosh janë në rrethe. Ministria e Arsimit pritet të marrë një vendim nëse do të ketë më rishpërndarje të kuotave të paplotësuara.
KUOTAT BOSH
Më konkretisht, shifrat e raportuara një ditë më parë flasin për rreth 5 mijë kuota të paplotësuara gjatë raundit të dytë në universitetet shtetërore e thuajse po aq edhe në ato private, ndonëse kanë shumë më pak kuota në dispozicion.
“Janë rreth pesë mijë kuota bosh, ndërkohë që flasim numri po vjen duke u zvogëluar. Te privatët është pak a shumë i njëjti numër. Regjistrimet në universitetet publike kanë qenë në nivelin e 80%, ndërsa ato te privati kanë qenë në masën e 50%, domethënë jo më shumë nga vitet e kaluara”, nënvizon Xhelaj.
Universitetet publike ofruan këtë vit akademik rreth 24 mijë kuota, ndërsa privatët mbi 9 mijë të tilla. Në regjistrimet e raundit të dytë, maturantët janë orientuar nëpërmjet portalit të klasifikimit, i cili pasqyron kuotat e lira pas çdo faze regjistrimi, duke sinjalizuar kandidatët fitues në kohë reale.
Në shumë raste, tabela me dhjetë degët e ngjyrosura tërësisht me ngjyrë të kuqe, në një nga fazat e regjistrimeve është shënjuar me të verdhë e më pas me të gjelbër, duke i bërë ata fitues në një ose disa degë./a.m.
