Kreu i Konfindustrias, Gjergj Buxhuku zbuloi detaje të reja mbi reagimin e bankave të nivelit të dytë, pasi BSH-ja vendosi shtyrjen e pagimit të kësteve të kredive me tre muaj, si pasojë e situatës së krijuar nga koronavirusi.
Në një lidhje telefonike me “News 24”, Buxhuku tha se ka informacione që bankat e nivelit të dytë kanë bërë rezistencë.
“E mbështesim deklaratën e BSH për shtyrjen e këstit të kredisë për kredimarrësit në bankat e nivelit të dytë, por duhet të dimë që BSH nuk i detyron bankat private, le të shohim tani si do zbatohet nga bankat e nivelit të dytë. Pasi është vetëm një rekomandim. Me sa kemi ne informacione ka filluar rezistenca nga bankat e nivelit të dytë. Nga ana tjetër duhet të theksojmë se edhe bankat e nivelit të dytë duhet të jenë të arsyeshme, të krijojnë një sistem për shtyrjen e shlyerjes së kredisë, se në të kundërt do kemi falimentime masive të bizneseve pasi kjo dëmton edhe bankat”, tha ai. /e.s/
