Pas pretendimeve të Oerd Bylykbashit dhe Ivi Kasos dhe ankimimit të tyre për datën e regjistrimit të listave, ka ardhur edhe reagimi nga 3 anëtarët e opozitës në KQZ. Përmes një deklarate të përbashkët, Klement Zguri, Hysen Osmanaj dhe Vera Shtjefni informojnë sot se deklaratat e KQZ në lidhje me afatin e 29 Prillit janë në kundërshtim me misionin e institucionit.
Në deklaratën e ditës së hënë, anëtarët e opozitës në KQZ thonë se ato janë qëndrime personale të Dena Bibës si edhe janë tejkalim flagrant i kompetencave të kryetarit të këtij organi.
“Fatkeqësisht në deklaratën e datës 29 Prill 2017, jashtë mbledhjes së KQZ dhe në tejkalim të çdo kompetence ligjore, në emër të KQZ, është bërë një interpretim subjektiv i nenit 67 të Kodit Zgjedhor, duke vendosur që “afati i regjistrimit të listave shumemërore të kandidatëve të partive politike, të regjistruara si subjekte zgjedhore për zgjedhjet e datës 18 qershor 2017 […] korrespondon me datën 29 prill 2017”, pavarsisht se në çdo perllogaritje kjo datë duhej të ishte 28 prill 2017, në mesnatë. Rrjedhimisht, çdo rregjistrim për lista të paraqitura nga subjektet tej këtij afati është nul, i paligjshëm dhe i pavlefshëm” – shkruan në deklaratën e 3 anëtarëve të Komisionit Qendror të Zgjedhjeve.
Sipas tyre, në shkelje flagrante të Kodit Zgjedhor, përmes një deklaratë të dytë (dt 30.4.2017), kryetari i KQZ shpiku norma të reja ligjore duke vendosur një afat tjetër ligjor për regjistrimin e subjekteve zgjedhore/listave të kandidatëve, datën 3 maj 2017. Osmanaj, Zguri dhe Shtjefni thone se dihet që ky afat ka mbaruar prej më shumë se 20 ditësh.
“KQZ nuk mund të krijojë apo ndryshojë afatet ligjore zgjedhore që i ka caktuar Kodi Zgjedhor përmes deklaratave por duhet vetëm t’i zbatojë ato. Shprehim shqetësim të thellë që këto qëndrime të përsëritura po kompromentojnë misionin e KQZ duke i dhënë KQZ, një pozicion partizan, të anshëm, në shërbim të mazhorancës politike aktuale. Nëse vazhdohet me këto qëndrime KQZ rrezikon të dëmtojë rëndë procesin zgjedhor” – thonë 3 anëtarët e opozitës në njoftimin e sotëm. /javanews/b.d
