Qeveria Rama nuk arriti të gjej prova konkrete për 21 janarin, dhe SPAK ia dorëzoi çështjen për ngjarjet e 21 janarit të vitit 2011 para kryeministrisë, sërish prokurorisë së Tiranës.
Sipas deputetit të PS Erion Braçe, pala që përfaqëson nuk mund të bënte më shumë. “Unë nuk mendoj që është detyra e qeverisë për të gjetur prova për një ngjarje kriminale. Nuk dua të shmangem por them se maksimumi i asaj që mund të bënim ishte Reforma e Drejtësisë. Kemi bërë edhe ne gabime, gjatë qeverisjeve të ndryshme, të Nanos, Metës, Majkos, të të gjithëve. Një pjesë e gjyqtarëve që po hetohen nga SPAK janë të asaj kohe, por detyra jone ishte të pastronim sistemin, për t’i dhënë mundësinë çdo shtetasi, qoftë politikan ose biznesmen, që të ketë vetëm aq sa i jep Kushtetuta, pra avokatin, dhe jo prokurorin e gjykatësin”, thotë ai i ftuar në ”Intervistë” me Merita Haklaj.
Sipas ish-zëvendëskryeministrit, “në 21 janar ndodhi që drejtësia nuk funksionoi, u pengua të funksiononte. Për sa kohë që urdhër arrestet nga prokuroria u penguan, atëherë aty nuk kemi vetëm vrasjen e katër personave dhe plagosja e 12 të tjerëve, por edhe akti i pengimit të drejtësisë, si dhe zhdukja e provave dhe prishja e vendngjarjes, bashkë me kamerat. Ne këtë kontekst, ne kaq mund të bënim”.
Sipas tij, ajo që ka funksionuar ka qenë kodi i heshtjes për 12 vjet radhazi, dhe për këtë bën një shembull të bujshëm të javëve të fundit, kapja e kreut të Cosa Nostra në Sicili.
“Ku ishte prokuroria, policia italiane këto 30 vite për Matteo Messina Denaro? Kodi i heshtjes mbron keqbërësit, dhe në një shoqëri me kode nderi që nuk duhet të ndajnë shqiptarinë sa kohë që është e vërteta e njerëzve në mes, jeta e njerëzve dhe korrupsioni, sepse këtu përfshihen të gjithë, qepin gojën pastaj. Për këtë kod duhet një instrument të duhur për ta luftuar. Prokurorët kanë filluar ta gjejnë duke goditur grupet kriminale, por nuk e kanë gjetur ende te korrupsioni”, thotë ai.
Për Bracën, çështja e 21 janarit “nuk është më çështje e prokurorisë së Tiranës, ka patur 12 vite kohe, ka bërë si të ishte përmbaruese, çdo gjë për ta mbyllur çështjen. Ka dy kallëzime, dhe ka një ngërç. E dini pse, sepse xhaxhai i Aleks Nikës nuk i jep provat sepse nuk ka besim te ajo prokurori, ka thënë publikisht dhe ka të drejtë se pret prej 12 vitesh, ndërkohë që ato kanë hetuar vetë, kanë pyetur dëshmitarë, dhe janë të habitur që prokuroria nuk ka bërë edhe aq sa kanë bërë ata”.
/a.r
