Ministri i Brendshëm Saimir Tahiri mori pjesë në një aktivitet me nxënës të shkollës 9-vjeçare “Qemal Mici” në Durrës, ku specialistët e qarkullimit shpjeguan disa prej rregullave bazë të trafikut dhe përdorimit të rrugës.
Qëllimi i aktivitetit ishte edukimi i fëmijëve të shkollave për të respektuar rregullat e trafikut rrugor si një element kyç për sigurinë e jetës së qytetarëve për një Shqipëri më të sigurt.
Drejtori i Qarkullimit Mitat Tola bëri një prezantim të rregullave të sigurisë rrugore për nxënësit si semafori, kalimi në vijat e bardha, shenjat e policisë rrugore, rripi i sigurimit etj.
Gjatë takimit, Ministri Tahiri u është përgjigjur pyetjeve të nxënësve në lidhje me ndëshkimet për shkelësit e rregullave të qarkullimit, duke theksuar zbatimin e ligjit njëlloj për të gjithë.
Ministri Tahiri: Shqipëria e fëmijëve është gjithmonë më e mirë se Shqipëria e të rriturve dhe detyra jonë më e madhe është të punojmë bashkë me ju, për të investuar bashkarisht në Shqipërinë e të ardhmes, në mënyrë që rregullat e qarkullimit rrugor të respektohen, në mënyrë që jeta të jetë më e sigurt.
Pyetje: Zoti ministër, ne shohim shumë qytetarë të alkoolizuar që ndëshkohen. Po të pushtetshmit ndëshkohen njësoj si ata?
Ministri Tahiri: Në të kaluarën, ligji nuk vlente për të gjithë. Pra ti me të drejtë thua, qytetarët ndëshkohen, – po të pushtetshmit, a ndëshkohen apo jo?! Kjo është pak a shumë si ta ndiesh veten në një klasë, ku për dy nxënës, mësuesja sillet ndryshe, pra nuk sillet njëlloj. Njërit i vë 10 edhe kur s’mëson, tjetrit i vë 4 gjithmonë dhe nuk ia vë 10-ën edhe kur mëson! Ne na duhet që mësuesi t’i trajtojë nxënësit njëlloj të gjithë, apo jo?! Ashtu siç na duhet që ligji në rrugë, të vlejë njëlloj për të gjithë.
Shqipëria është mësuar, dhe për ta krahasuar me një klasë mësimi, – të ketë nxënës që nuk mësojnë vazhdimisht, që ngelin në klasë vazhdimisht dhe nuk ndëshkohen kurrë. Ne duhet të bëjmë ndryshe, dhe ne po mundohemi të bëjmë ndryshe. Prandaj na duhet edhe ndihma juaj”.
Më pas nxënësit kanë marrë pjesë në një demonstrim konkret të zbatimit të rregullave të trafikut, të shoqëruar nga specialistët e policisë rrugore.
Gjatë demonstrimit është theksuar se shkolla “Qemal Mici”, është përzgjedhur për shkak se nga statistikat rezulton që zona në të cilën gjendet, është një ndër më të prekurat nga aksidentet rrugore.
Fëmijët janë këshilluar t’u kërkojnë prindërve që në mjet të vendosin gjithmonë rripat e sigurimit dhe të mos e tejkalojnë asnjëherë kufirin e shpejtësisë së lejuar. Atyre u është kërkuar që nëse shohin probleme ose diçka që nuk shkon në rrugë, të njoftojnë menjëherë policinë./a.m.
