Të paktën 15 persona kanë humbur jetën dhe dhjetëra të tjerë janë plagosur nga sulmet me raketa dhe dronë që Rusia kreu gjatë natës ndaj Kievit dhe zonave përreth, njoftuan autoritetet ukrainase.
Sipas Forcave Ajrore të Ukrainës, Rusia lëshoi 115 dronë dhe 28 raketa, përfshirë raketa balistike.
Nga ana tjetër, Ministria ruse e Mbrojtjes tha se sulmet goditën qendra logjistike dhe furnizimi në Kiev dhe rajonin përreth, të cilat, sipas saj, përdoreshin për qëllime ushtarake. Moska gjithashtu pretendoi se goditi tre anije mallrash pranë portit të Odesës në Detin e Zi.
Ndërkohë, Shtetet e Bashkuara po vazhdojnë bisedimet për t’i mundësuar Ukrainës prodhimin e raketave interceptuese Patriot, të cilat Kievi i konsideron jetike për mbrojtjen nga sulmet ruse. Këto diskutime vijojnë edhe pasi Presidenti Donald Trump shprehu dyshime për një marrëveshje të tillë.
Sulmet vijnë në një kohë kur të dyja palët kanë shtuar ndjeshëm sulmet me rreze të gjatë, ndërsa Rusia ka më shumë se dyfishuar përdorimin e raketave gjatë muajit korrik.
