Një ngjarje e rëndë tronditi opinionin publik ditën e sotme, teksa pas një sherri mes të miturish pranë shkollës 9-vjeçare “Fan Noli”, ka mbetur i vdekur Martin Cani, teksa është plagosur një i dytë.
14-vjeçari ishte pjesë e skuadrës U-15 të Dinamos, ashtu si edhe i plagosuri L.M. i cili po trajtohet në spital.
Të dy kishin qenë pjesë e skuadrës e cila vetëm një ditë më parë kishte luajtur ndeshje në kampionatin e kësaj grumposhe përballë Besës së Kavajës.
Klubi i Dinamos, ku 14-vjeçari luante ka publikuar foton e të miturit dhe i ka shprehur ngushëllime familjarëve për ngjarjen tragjike.
Postimi i Dinamos në Facebook:
Jemi thellësisht të tronditur nga lajmi tragjik për ndarjen e parakohshme nga jeta të lojtarit tonë Martin Cani, pjesë e skuadrës U-15. Presidenti Adrian Bardhi dhe klubi FC Dinamo City i shprehin ngushëllimet më të sinqerta familjes Cani dhe i gjenden pranë në këto momente shumë të vështira.
U prehsh në paqe Martin!
Ngjarja ndodhi rreth orës 13:10 të së hënës në shkollën “Fan Noli”, menjëherë në përfundim të orarit të mësimit. Fillimisht, në sherr u përfshinë një grup adoleshentësh të moshës 14 dhe 15 vjeç. Ata ishin nxënës në shkollën Fan Noli, 200 metra larg vendit ku ndodhi dhe ngjarja, dhe disa të tjerë, nxënës në një shkollë në Sauk.
Pas debateve me fjalët banale, sherri vijoi mes tre adoleshentëve, të cilët morën dhe lëndime me thikë. Një orë pasi mbërriti në spitalin e Traumës, 14-vjeçari ndërroi jetë pas goditjes që kishte marrë në zemër.
Policia nuk ka ende të qartë motivet e krimit. Por nga veprimet paraprake ka dyshime që adoleshentët të jenë konfliktuar disa ditë më parë që në rrjetet sociale.
Në polici janë shoqëruar disa nxënës që ishin dëshmitarë të këtij konflikti që përfundoi tragjikisht me një vrarë e dy të plagosur. Ata janë marrë në pyetje në prani të psikologut.
