Dhëndri i Sali Berishës, Jamarbër Malltezi, ka sulmuar ish-ambasadorin amerikan John Withers për kabllogramin drejtuar Departamentit të Shtetit, por edhe median që ka publikuar kabllogramin. Në të ai akuzohej për planin e prishjes së shtëpive në Jalë.
Në reagimin e tij, Malltezi thotë se po lufton kundër betonit.
Plani i Malltezit “kundër betonit” duket se ka filluar që kur në prill 2007, i prishi shtëpinë Sanie Halilajt në Jalë, që ajo kishte ndarë me bashkëshortin e saj për më shumë se gjysmë shekulli. Po kështu familjes Andoni dhe shumë banorëve të tjerë autoktonë. Sipas një investigimi të BIRN, asokohe zyrtarët e BB fillimisht mohuan që dëbimet nga shtëpitë të ishin të lidhura me iniciativën bregdetare të financuar prej bankës. Por një vit më vonë Paneli i Inspektimit të bankës gjeti ‘lidhje direkte’ midis projektit për zhvillimin e zonave bregdetare dhe shembjeve. Madje pasi u publikua raporti i panelit në 2008, presidenti i atëhershëm i Grupit të Bankës Botërore Robert Zoellick i quajti veprimet e bankës si ‘të tmerrshme’. “Banka nuk mund ta lejojë këtë të ndodhë sërish”, tha ai.
A mos koordinatori Malltezi kërkon të thotë se nuk dinte asgjë për prishjet në Jalë? Se policinë ndërtimore shqiptare e dërgoi vetë BB nga Uashingtoni, duke prishur si banesat e vjetra, edhe shtesat ngjitur me to?
Gjithsesi, duke e marrë për të sinqertë shqetësimin e tij për impektin ambiental të këndit të fëmijëve në parkun e Tiranës, dikush duhet ta ftojë dhëndrrin mjedisor të protestojë edhe përpara selisë së bashkisë Kamëz, inspektorët ndërtimorë të së cilës rezulton se kanë lejuar mbi 80 ndërtime pa leje. A e shqetëson ky fakt Malltezin?
DITA
