SHBA paralajmëron Serbinë pas blerjes së armëve nga Rusia: Do keni pasoja të rënda, kujdes

Zyrtarja amerikane nga Pentagoni, Laura Cooper,  në një intervistë për Zërin e Amerikës, ka folur për tregtinë e armëve që Serbia e bën me Rusinë.

Zyrtarja amerikane ka thënë se dihen qartë pasojat për ata që blejnë pajisje ushtarake nga Rusia.

Cooper ka përmendur Ligjin CATSA që nënkupton kundërshtimin e kundërshtarëve të Amerikës përmes sanksioneve dhe thotë se një rregulli të tillë i përmbahen.

Njeheresh Shtetet e Bashkuara të Amerikës janë të fokusuara në stabilitetin e Ballkanit perëndimor pas paralajmërimeve se Rusia mund të ndërhyjë në rajon.

Deklarata vjen nga zëvendës ndihmës Sekretarja amerikane e Mbrojtjes për Rusinë, Ukrainën dhe Eurazinë, Laura Cooper.

“Pa dyshim ka një histori të përpjekjeve të Rusisë për të ndërhyrë në rajon duke u përpjekur të nxisë tensione. Dhe mendoj se ne po shohim që vazhdon edhe sot e kësaj dite. Jam vërtet e kënaqur jo vetëm nga niveli i vëmendjes së Shteteve të Bashkuara ndaj rajonit, por edhe se mendoj se edhe partnerët tanë të BE-së janë investuar shumë në sigurimin e stabilitetit”

Në një intervistë për Zërin e Amerikës, diplomatja shprehet se Moska mund të destabilizojë rajonin duke përdorur ndërhyrje kibernetike, shitjen e armëve si dhe përdorimin e korrupsionit.

“Rusia ka një sërë taktikash që mund t’i përdorë përsëri. Ajo mund ti rikthehet  përdorimit të strategjive të caktuara, duke përfshirë ndërhyrjen kibernetike, dhe së fundmi kemi parë shembuj të kësaj, pastaj manipulimi i hapësirës informative që është ende prezente. Ato mund të instrumentalizojnë korrupsionin, i cili ka një efekt veçanërisht gërryes në rajon. Dhe sigurisht ata mund të përdorin shitjen e armëve, burimet ushtarake si një mjet ndikimi.”

E pyetur nëse ka një paralelizëm mes ndërhyrjes e Rusisë në Ukrainë me atë të NATO-s në vitin 1999 në Serbi për të ndalur Millosheviçit, zyrtarja e lartë u përgjigj:

“Nuk ka absolutisht asnjë ngjashmëri mes këtyre situatave. Ajo që shohim sot është një fuqi e madhe që ka zgjedhur të sulmojë një qeveri të zgjedhur në mënyrë demokratike pa asnjë provokim dhe po kërkon të pushtojë pjesë të konsiderueshme të atij vendi duke bombarduar popullsinë civile dhe duke penguar dhënien e ndihmës humanitare .”

Duke u ndalur në marrëdhënien e ngushtë Rusi-Serbi edhe në mosvendosjen e sanksioneve ndaj Moskës, diplomatja amerikane nënvizoi se Beogradi duhet të marrë vendimin e tij dhe të ndëshkojë një vend që po bombardon civilët./m.j