Makina që u përdor nga atentatorët e vrasjes së të premtes së kaluar në aksin rrrugor Lushnje Fier është marrë me qira në kryeqytet nga i arrestuari Ilir Memushaj. Grupi hetimor ka arritur të bjerë në gjurmët e mjetit “Toyota” që u gjet i djegur rreth 1 kilometër larg vendit të ngjarjes, në fshatin Vajkan.
Ka qenë pikërisht zbardhja e të dhënave të mjetit që e ka çuar Policinë e Fierit në arrestimin e 37-vjeçarit nga Vlora, Ilir Memushaj.
Burime nga grupi hetimor bënë të ditur se mjeti që u gjet i djegur, me të cilin, sipas të dhënave, kanë udhëtuar autorët e atentatit, ku një person mbeti i vrarë e dy u plagosën, është marrë me qira në Tiranë me emrin e të arrestuarit Memushaj.
Menjëherë pas identifikimit të tij, është bërë i mundur arrestimi, ndërsa po hetohet për të zbuluar autorët e tjerë. Burime nga grupi i hetimit bënë të ditur se i arrestuari Ilir Memushaj nuk ka dhënë asnjë informacion për mjetin dhe qëllimin e marrjes me qira.
Ai gjatë marrjes në pyetje mësohet se nuk e ka pranuar autorësinë e krimit, madje ka dhënë edhe alibitë e tij në lidhje me vendndodhjen në momentin kur ka ndodhur atentati, alibi e cila është duke u verifikuar nga hetimorët.
Mësohet se ai e ka mohuar njohjen me viktimën Denis (Granit) Kasaj, por edhe me të plagosurit Elton Margariti dhe Kelmend Kastrati.
“Natën kur ka ndodhur vrasja, unë nuk kam qenë fare në Fier. Kam qenë i ftuar te disa miq të mi. Mund ta verifikoni”, mësohet të ketë deklaruar 37-vjeçari vlonjat.
Policia e Fierit ka marrë në pyetje dy të plagosurit, të cilët ndodhen jashtë rrezikut për jetën në kujdesin e bluzave të bardha dhe në mbikëqyrjen e efektivëve. Por mësohet se ata deri më tani nuk kanë dhënë asnjë detaj që mund të çojë policinë drejt zbardhjes së këtij krimi të rëndë, që për pak u mori jetën edhe atyre.
“Dëshmitë e tyre nuk po na ndihmojnë sepse nuk japin detaje rreth konflikteve të mundshme që mund të kenë pasur. Ata mohojnë konflikte me persona të tjerë”, thanë burimet në Policinë e Fierit. Deri më tani, personi që dyshohet të ketë qenë shënjestër e këtij atentati është Kelmend Kastrati.
Madje, sipas burimeve, ky i fundit ka pasur një konflikt të ashpër vitin e kaluar me të arrestuarin Ilir Memushaj. 37-vjeçari kishte qenë me miq të tij në Fier dhe ka debatuar ashpër deri edhe në përplasje fizike e kërcënime të ndërsjellta me Kastratin.
Pas sinjalizimit të policisë, në vend ka mbërritur një grup patrulle që është ndodhur më afër. Por, më pas, të dyja palët u kanë deklaruar bluve se nuk ishte asgjë për t’u shqetësuar dhe se gjithçka e kishin zgjidhur me mirëkuptim. Ndërhyrja e policisë e ka sheshuar sherrin në atë moment dhe nuk është parë e arsyeshme nga ana e uniformave blu për t’i shoqëruar ata dhe as për të regjistruar procedim. Panorama.al
