Disa orë pas gjetjes së trupit të pajetë të 37-vjeçarit Jani Kollçinaku i njohur me nofkën “Landi i Mirasit”, në aksin rrugor Korçë-Bilisht, policia ka dhënë detaje të reja në lidhje me ngjarjen. Sipas bluve të Korçës, viktima, person i dënuar më parë për trafik droge, është qëlluar me një plumb në kokë.
“Në vijim të informacionit paraprak, datë 19.12.2015, i cili bën fjalë për vrasjen e shtetasit Jani Kollçinaku, 37 vjeç, banues në fshatin Miras, Devoll, trupi i te cilit u gjet sot, i pajetë, në afërsi të fshatit Zëmblak, në anë të rrugës, ju informojmë se: Nga verifikimet e kryera, si edhe nga këqyrja e kufomës në morgun e Spitalit, rezulton se ky shtetas, është qëlluar me një plumb në kokë. Gjithashtu dyshohet se vrasja, mund të jetë kryer në një vend tjetër dhe jo në vendin ku u gjend trupi i viktimës. Nga ana e Strukturave të Policisë, është bërë shoqërimi në Komisariat i disa personave për të marrë deklarimet e tyre, në lidhje me këtë ngjarje. Shtetasi Jani Kollçinaku, njihet si person me precedent penal të mëparshëm i dënuar me 6 vjet heqje lirie për veprën penale “Trafikim i lëndëve narkotike”. Grupi hetimor po vijon punën, për zbardhjen e autorësisë, motiveve dhe rrethanave në cilat ka ndodhur kjo ngjarje.”, citohet në deklaratën e policisë.
