Të shohësh me kë një adoleshent hyn në kontakt, të marrësh njoftime kur ai regjistrohet në një grup ose largohet prej tij, të përcaktosh se cilat përditësime të statusit mund të shohë dhe kush mund t’i shohë ato, si dhe të vendosësh përvojën e inteligjencës artificiale më të përshtatshme për një adoleshent.
Këto janë disa nga opsionet e përfshira në “kontrollin prindëror” të WhatsApp, i cili po lançohet në mbarë botën, përfshirë edhe Italinë. Risia vjen në një klimë të vëmendjes në rritje në mbarë botën ndaj sigurisë dhe shëndetit mendor të të miturve. Vetëm pak javë më parë, BE-ja propozoi Kids Act, i cili përcakton kufizime të rrepta moshe për rrjetet sociale dhe u kërkon kompanive teknologjike të dëshmojnë se platformat e tyre janë të sigurta që në fazën e projektimit.
Kontrolli prindëror në WhatsApp i shtohet masave të tjera për adoleshentët, të miratuara më herët nga aplikacionet e tjera të grupit Meta. Në Instagram, Facebook dhe Messenger janë aktivë “llogaritë për adoleshentë”, të destinuara për djemtë dhe vajzat nga 13 deri në 17 vjeç. Ndërsa mjete për mbikëqyrjen prindërore janë të pranishme edhe në platformat e kompanive të tjera, si TikTok, YouTube dhe Snapchat.
Bëhet fjalë për aplikacione në të cilat të rinjtë po kalojnë gjithnjë e më shumë kohë. Sipas një studimi të Eurostat, të publikuar në gusht, vetëm në Evropë të rinjtë nga 13 deri në 18 vjeç kalojnë mesatarisht 4 orë e gjysmë në ditë online gjatë ditëve të shkollës dhe plot 6 orë në ditë gjatë fundjavës.
Nëse një adoleshent dëshiron të ndryshojë cilësimet, do t’i duhet miratimi i prindit përmes një PIN-i të përcaktuar nga vetë prindi. Sistemi parashikon një PIN të vetëm, si dhe “njoftime të qarta për t’i mbajtur prindërit të informuar”.
Edhe kur kontrollet janë të aktivizuara, sqaron WhatsApp, “telefonatat dhe mesazhet personale të adoleshentëve mbeten private dhe të mbrojtura nga enkriptimi end-to-end. Askush jashtë bisedës, madje as WhatsApp, nuk mund ta shohë apo dëgjojë përmbajtjen e tyre”.
“Ky është vetëm hapi i parë. Po i zhvillojmë këto kontrolle hap pas hapi, bazuar në udhëzimet që marrim nga familjet”, thekson kompania e grupit Meta.
Mjetet e reja për prindërit dhe fëmijët në platformën e Mark Zuckerberg vijnë në një moment kur është rritur ndjeshmëria, si nga institucionet ashtu edhe nga përdoruesit, ndaj çështjeve të sigurisë dhe shëndetit mendor që lidhen me përdorimin e platformave teknologjike dhe inteligjencës artificiale, veçanërisht nga të rinjtë.
