Menaxheri i Leicester City, Claudio Ranieri ka nënshkruar kontratë të re katërvjeçare me kampionin e Premierligës. Italiani, 64-vjeç, udhëhoqi “Foxes” drejt titullit të parë në elitë në sezonin e tij të parë në detyrë.
Dhe, ai i është bashkuar futbollistëve Kasper Schmeichel, Wes Morgan e Jamie Vardy duke nënshkruar kontratë të re në klub.
“Energjia që ekziston këtu, nga pronarët dhe stafi tek futbollistët dhe tifozët është diçka shumë speciale”, deklaroi Ranieri për faqen zyrtare të Leicesterit.
“Sezonin e kaluar, ai shpirt dhe puna e madhe na ndihmoi të arrijmë diçka magjike. Nëse ne mund të vazhdojmë punën e madhe, ta ruajmë pasionin dhe të vazhdojmë të luftojmë me gjithë zemrat tona, jam i sigurt se mund të vazhdojmë të jemi të suksesshëm së bashku”, u shpreh ai.
Ranieri me ekipin e tij i befasoi të gjithë duke triumfuar në Premierligë në edicionin e kaluar, dhe siguroi kualifikimin për në fazën e grupeve të Ligës së Kampionëve, referon Express. (b.an)
