Graziano Pelle është përjashtuar nga ekipi i Italisë për ndeshjen e ardhshme kundër Maqedonisë pasi refuzoi të përshëndetej me selektorin Giampiero Ventura pas zëvendësimit të tij në duelin ndaj Spanjës.
Sulmuesi i Shandong Luneng ishte titullar në barazimin 1:1 kundër Spanjës në Torino.
Por, u zëvendësua nga Ciro Immobile pas një ore lojë kur “Azzurrët” ishin në disavantazh pas golit të Vitolo. Italia në fund e shpëtoi një pikë pas penalltisë së Daniele De Rossit, përcjell “Zëri.info”.
Por, Pelle nuk do të jetë në dispozicion për ndeshjen e ardhshme pas ndëshkimit nga Federata e Futbollit të Italisë (FIGC).
“Giampiero Ventura në marrëveshje me FIGC ka vendosur ta përjashtojë Graziano Pellen nga ekipi për ndeshjen ndaj Maqedonisë të dielën më 9 tetor në Shkup për sjellje të pahijshme në momentin e zëvendësimit në takimin ndaj Spanjës”, thuhej në komunikatën e FIGC-së.
Pelle ka bërë 20 paraqitje për Italinë pas debutimit në ballafaqimin kundër Maltës në tetor të vitit 2014. Ai ka shënuar nëntë gola, përfshirë tre në “Euro 2016”, përgatiti Express. (b.an)
