Veprimtaria e Zyrave të Punës luan një rol ndërmjetësimi për të integruar kapitalin njerëzor në tregun e punës.
Drejtori i Shërbimit të Punësimit dhe Migracionit, Neshat Zeneli, pranë Shërbimit Kombëtar të Punësimit ka shpjeguar në një intervistë për “Ora News” se çfarë kanë për detyrë të bëjnë Zyrat e Punës për qytetarët.
“Në sistemin e Zyrave të Punës regjistrohen të gjithë ata persona, të cilët janë të interesuar të kërkojnë punë. Zyrat e Punës nuk janë thjesht një zyrë ku ti regjistrohesh për të marrë një vërtetim. Qëllimi kryesor i Zyrës së Punësi është që personat e të gjitha kategorive, të cilët janë të gatshëm të kërkojnë punë. Më tej Zyrat e Punës duhet të realizojnë atë që quhet intervistim profesional; të kenë informacion të plotë mbi tregun e punës, t’i japin informacion personit mbi vendet e lira të punës, profesionet qw kërkohen, çfarë kualifikimesh kërkohen dhe të bëjnë atë që quhet ndërmjetësimi në tregun e punës”, – ka nëvizuar ai.
Ndërkaq, jo të gjitha vendet e punës të regjistruara pranë Zyrave të Punës mund të aksesohen nga publiku në faqen online të Shërbimit Kombëtar të Punësimit. Për këtë ka një shpjegim. “Përveç sistemit online vendet e lira të punës shpallen edhe në një sistem të brendshëm të Zyrave të Punës. Kjo është e lidhur vetë me legjislacionin në fuqi sepse një biznes që nuk do ta shfaqë vendin e tij të lirë të punës në sistemin online i drejtohet Zyrës së Punës dhe mund ta regjistrojë në sistemin informatik të Zyrave të Punës”, – ka shpjeguar Zeneli.
Nga ana tjetër drejtori i Shërbimit të Punësimit dhe Migracionit ka folur për sektorët që kanë pasur kërkesat më të mëdha për punësim si edhe numrin e të papunëve të punësuar nëpërmjet Zyrave të Punës për vitin e kaluar. “Gjatë vitit 2015, Shërbimi Kombëtar i Punësimit ka shpallur në total rreth 36 mijë vende të lira pune nga ku 5 sektorët dominantë kanë qenë sektori i industrisë përpunuese, sektori i komunikacionit dhe informacionit, sektori i tregtisë, sektori i ndërtimit dhe sektori i turizmit. Nga këto vende pune, Zyrat e Punësimit kanë plotësuar rreth 20 mijë vende të lira pune, të cilat janë ndërmjetësuar drejtpërdrejtë”, – ka deklaruar ai.
Duke folur për se numri i studentëve që përfundojnë çdo vit ciklin qoftë batchelor apo master është rreth 40 mijë, drejtori i Shërbimit të Punësimit dhe Migracionit, ka analizuar përqasjen që universitetet duhet të kenë në lidhje me tregun e punës. “Fakti që në tregun e punës hyn një numër kaq i madh, natyrisht që kjo kërkon reflektimin e vet, qoftë për punësimin e tyre, qoftë edhe për riorientimin e profileve të reja të universiteteve dhe për lidhjen e tyre me tregun punës, në mënyrë që personat që përfundojnë fakultetet të jenë të përgatitur për t’u integruar në tregun e punës. Pra jo vetëm të kenë njohuri teorike, por mundësisht të marrin sa më shumë aftësi praktik” – ka theksuar Zeneli.
