Sipas Indeksit të Agjensisë Globale Mbikqyrëse për Moshën (Global Age Watch Agency Index), Shqipëria rënditet në vendin e 53-të të vendeve ku plakesh më mirë, në një klasifikim mes 96 vendesh në botë. Në vendin e parë është Zvicra vendi ku plakesh më mirë, ndërsa Italia fqinje, pavaresisht se është një vend me jetëgjatësinë më të madhe renditet vetëm në vendin e 37-të. Ky klasifikim përgatitet nga shoqata ndërkombëtare ‘Help Age’ dhe universiteti Southampton, raporton Ansa.
Vlerësimi bëhet në bazë të situatës e politikave mbi të moshuarit në katër fusha të ndryshme, si të ardhurat, shëndeti, edukimi dhe mundësitë për të lëvizur në mënyrë të pavarur. Menjëherë pas Zvicrës janë Norvegjia dhe Suedia ato që zenë vendet kryesuese të këtij klasifikimi, ndërsa në vendin e fundit rënditet Afganistani.
Rënditja e Shqipërisë ka patur ndryshime ndër vite, dhe shënon rritje në fushën e aftësive (24) me një nga nivelet më të larta të punësimit në rajon (me 57,7%), raporton Agjensia Globale Mbikqyrëse për Moshën në Indeksin e publikuar së fundmi.
Vendi ynë ka patur ndryshime të moderuara dhe në fushën e të ardhurave nga siguracioni (45) me një normë nën mesatare të varfërisë në pleqëri (5,3 %), e dyta më e ulët në rajon, dhe të ardhurat e mbulimi nga pensioni janë mbi mesataren globale (77%), pavarësisht se nën mesataren e të ardhurave kombëtare bruto për frymë.
Në skemën e përgjithshme mbi shqipërinë, aktualisht numërohen rreth gjysëm milioni persona mbi moshën 60 vjeçare, pra 17,8% për vitin 2014 e që pritet të arrijë në 25,5% në 2030 dhe në 30,9% në 2050.
Shqipëria ka një rënditje të ulët në fushën shëndetësore (61), me një mesatare të ulët në jetëgjatësi, por mbi mesataren rajonale të treguesit të mirëqënies psikologjike. Ajo rënditet në nivel të ulët në fushën e mundësive të mjedisit (86), teksa në 2014-ën kishte nivelin më të ulët në rajon për të katër treguesit në këtë fushë.
Si pjesë e fushatës së Mobilizimit të Kërkesave të Moshës (Age Demands Action) , njerëzit e moshuar në Shqipëri po rrisin ndërgjegjësimin për çështjet e problemeve mendore dhe sëmundjen e Alzheimer-it. Shoqatat e personave të moshuar kanë krijuar gjithashtu një rrjet për të ndarë prioritetet e fushatës së tyre.
“Ky indeks ndërkombëtar është mjaft i rëndësishëm për të prezantuar kushtet e jetesës së të moshuarve në botë, shpjegon kordinatori Asghar Zaidi, – jo vetëm duke u përballur me pensionin dhe shëndetin e tyre por dhe me ambinetin ‘miqësor’ ku jetojnë”.
Në këtë klasifikim sipas tij, evidentohen vendet që kanë politika favorizuese për pensionet sociale, për shëndetin e përgjithshëm dhe që bëjnë të mundur krijimin e ambienteve të përshtatshme për jetën fizike dhe sociale të të moshuarve.
