Befasuese nga Blick! Tabloidi zviceran, i akuzuar vetëm tri ditë më parë se po fuste përçarje në kombëtaren shqiptare me pretendimin se babai i Lorik Canës kishte marrë vendim për lënien jashtë të Berat Gjimshitit, do të flasë shqip gjatë kësaje jave.
Shqipëria dhe Zvicra janë në të njëjtin grup dhe ndeshen midis tyre më 11 qershor, por ndërkaq në Zvicër jetojnë mijëra shqiptarë. Në faqen e parë të numrit të sotëm, Blick ka njoftuar se do të shkruajë edhe në gjuhën shqipe gjatë javës, deri në ndeshjen midis dy skuadrave.
“Të nderuar motra dhe vëllezër nga Zvicra, gjatë tanë javës së ardhshme gazeta Blick ju informon në gjuhën shqipe. Ngjarjet më aktuale të Kombëtares Shqiptare – çdo ditë në gjuhën e juaj”, shkruhet në pjesën e sipërme të faqes së parë.
Të njëjtin njoftim e ka bërë edhe në faqen në internet, ku gjithashtu do të ketë artikuj në gjuhën shqipe.
d.i.