Zëvendësmarshalli britanik i forcave ajrore, Sean Bell, ka analizuar zhvillimet e fundit në terren nga lufta, ku u fokusua kryesisht te rikthimi i sulmeve në Kiev.
Ai tha se sulmet në Kiev gjatë natës së kaluar nga forcat e Kremlinit ishin me shumë gjasa një formë “hakmarrjeje” për humbjen e anijes luftarake ruse, Moskva si dhe “guximit të ukrainasve për të sulmuar caqet e largëta të Rusisë”.
“Duket se është shënjestrim strategjik. Ka objektiva specifike në të gjithë Ukrainën që merren me prodhimin e raketave ose të aeroplanëve”, tha ai.
“Ato objektiva ka gjasa që i dinin rusët, por pse ata do të zgjidhnin tani t’i shënjestrojnë? Kjo ndihet më shumë si një reagim për guximin e forcave ukrainase”, pohoi marshalli, raporton skynews.
Duke folur për zjarrin në bordin e flotës së Detit të Zi, Bell tha se rusët dijnë të kamuflojnë dështimet përmes propagandës.
“Rusët i janë përmbajtur historisë së tyre dhe pretendojnë se ka humbur nga një zjarr. Kam shërbyer në disa detashmente transportuese dhe rreziku nga zjarri është një nga gjërat më të rëndësishme për të cilat ekuipazhet stërviten çdo ditë. Të kesh një zjarr kaq të rëndë sa të shkaktojë fundosjen e anijes është e pazakontë, veçanërisht tani”, tha ai.
Së fundi, Rusia ka publikuar pamjet e para të marinsave të luftanijes së mbytur Moskva, të cilët aktualisht gjenden në Sevastopol.
Ndërkohë, autoritetet ukrainase kanë deklaruar se kanë vrarë edhe kapitenin rus të luftanijes, të cilën gjë po e mohon Kremlini.
/a.r
