Zëvendëskryeministrja Albana Koçiu ka zhvilluar sot një takim me prindër pranë Qendrës Multifunksionale në Lezhë, ku ka sjellë në vëmendje masat e fundit të qeverisë për mbështetjen e fëmijëve me aftësi ndryshe dhe familjeve të tyre.
Koçiu bëri me dije se nga muaji gusht është dyfishuar pagesa për fëmijët me aftësi ndryshe, si dhe për fëmijët e verbër deri në moshën 18 vjeç. Ndërkohë, nga muaji tetor nis edhe pagesa e kontributeve të sigurimeve shoqërore dhe shëndetësore për kujdestarët e personave me aftësi të kufizuara dhe ndihmësit personalë të tyre.
“Janë rreth 11 mijë fëmijë të cilët do të marrin pagesa të dyfishuara dhe nga fillimi i muajit tetor kemi mbi 14 mijë kujdestarë dhe ndihmës personalë, të cilëve do t’u paguhen kontributet e sigurimeve shoqërore dhe shëndetësore”, u shpreh Koçiu.
Zëvendëskryeministrja shtoi se kjo masë do t’u mundësojë kujdestarëve të kenë një pension të sigurt në të ardhmen, ndërsa do të përfitojnë gjithashtu nga skema e sigurimeve shëndetësore, përfshirë mbështetjen në rast të paaftësisë së përkohshme për punë, aksidenteve në punë dhe përfitime të tjera që ofron skema e sigurimeve shoqërore dhe shëndetësore. Koçiu theksoi se rritja e pagesave dhe mbështetja e re financiare mundësohen nga buxheti i shtetit, i cili, sipas saj, është rritur si rezultat i rritjes ekonomike.
“Rritja e pagesave patjetër që financohet nga buxheti i shtetit, i cili ka ardhur çdo vit duke u rritur për shkak të rritjes ekonomike. Kjo na garanton që ne të kthejmë vëmendjen dhe të përkushtohemi për të rritur të gjitha ato mbështetje sociale dhe ekonomike për shtresat në nevojë, për personat me aftësi të kufizuara dhe për të gjitha kategoritë në nevojë”, tha Koçiu.
Gjatë takimit me prindërit, Koçiu u ndal edhe te zgjerimi i shërbimeve sociale në të gjithë vendin.
“Na vjen shumë mirë që ne mundësojmë, nëpërmjet Fondit Social, mbështetje këtu për stafin, për të pasur më shumë profesionistë në dispozicion për të shërbyer dhe, patjetër, edhe për të përmirësuar akoma më shumë cilësinë e shërbimit që ofrojmë”, u shpreh ajo.
Koçiu tha se numri i shërbimeve sociale është rritur në të 61 bashkitë e vendit. Sipas saj, nga 83 shërbime që ofroheshin rreth një vit e gjysmë më parë, sot janë 98 shërbime sociale që ofrohen në qendra të ndryshme në të gjithë vendin.
Në këto shërbime punojnë mbi 800 profesionistë të fushave të ndryshme, duke u krijuar familjeve mundësi për të vijuar jetën e tyre të përditshme dhe prindërve mundësi për të punuar, ndërsa fëmijët marrin mbështetjen e nevojshme për zhvillimin e tyre.
Në përfundim, Koçiu theksoi se synimi është ndërtimi i një Shqipërie sociale dhe europiane, ku mundësitë dhe shërbimet të jenë të aksesueshme për të gjithë.
“Qëllimi ynë fundor është Shqipëria europiane, por ne nuk mund të shkojmë dhe të aderojmë në familjen e madhe europiane pa u kujdesur njësoj për të gjithë. Kjo është arsyeja pse edhe Shqipëria sociale, programi më i fundit që kontribuon jo vetëm për shtresat në nevojë apo familjet që kanë kategori vulnerabël, por në çdo aspekt të projekteve dhe programeve që qeveria po ndërmerr, ka në fokus mundësimin dhe ofrimin e mundësive të barabarta për të gjithë individët në shoqëri”, përfundoi Koçiu.
