Gjashtë ministrat teknikë dhe zëvendës kryeministrja, të emëruar nga Partia Demokratike pas marrëveshjes Rama-Basha për garantimin e standardeve të zgjedhjeve të 25 qershorit dorëzojnë dorëheqjen tek kryeministri Edi Rama.
Zyrtarisht dorëhiqen të gjithë ministrat teknikë të PD në qeverinë Rama pas tre muajve në detyrë.
Zv/kryeministrja Lendina Mandija dhe ministrat Dritan Demiraj, Helga Vukaj, Mirela Karabina, Gazmend Bardhi, Xhuljeta Kërtusha e Arben Beqiri i kanë dorëzuar Ramës dorëheqjen në mënyrë elektronike.
Dorëheqjet u paraqiten rreth orës 14:00 (17 gusht2017) duke i dhënë fund në këtë mënyrë edhe bashkëqeverisjes PD-PS e lindur pas marrëveshjes Rama-Basha mbrëmjen e 18 majit.
Kompetencat e tyre do t’i kalojnë zëvendësministrave deri në formimin e qeverisë së re.
Ndërsa Ledina Mandija ka dorëzuar mesditën e sotme në Kryeministri raportin që hartuan teknikët për zgjedhjet e 25 qershorit.
Por ky raport, ciëlsohet tërësisht i jashtëligjshëm nga ana e qeverisë.
Përmes një reagimi për JavaNews.al, burimet nga qeveria thonë se Raporti nuk u diskutua dhe as miratua në Task-Forcë, siç parashikohet në VKM e ngritjes së kësaj strukture.
“Raporti final mbi zgjedhjet konsiderohet proceduralisht jo korrekt/ i paligjshem sepse nuk eshte diskutuar dhe miratuar ne mbledhjen e task forces sipas parashikimeve te VKM e cila e legjitimoi task forcen dhe percaktoi funsionet e saj.
Ajo task force esht krijuar mbi bazen e nje vkm, esht me e gjere ne perberje se sa vetem ministrat teknike dhe cdo duhet te diskutohej/votohej ne task force.
Ky esht nje raport vetem i ministrave teknike, i pa diskutuar/votuar ne taskforce“, thonë burimet e JavaNews nga kryeminsitria.
Kështu pas tre muajve në detyrë, teknikët e PD largohen nga qeveria, ndërsa aktualisht kabineti Rama përbëhet vetëm nga ministrat e PS dhe të LSI.
Ministrat e PD u emëruan nga Rama me propozim të Bashës në bazë të marrëveshjes së 18 Majit, si garanci për zgjedhjet e 25 qershorit, të cilat PD i humbi.
Roli i ministrave në qeveri ishte të kontrollonin sjelljet e administratës përgjatë gjithë procesit elektoral në mënyrë që të mbrohej vota e lirë e qytetarëve shqiptarë.
Gjatë fushatës së shkurtër elektorale ministrat denoncuan publikisht raste të ndryshme kur punonjës të administratës shkelën ligjin dhe ndikuan në procesin zgjedhor, denoncimet u shoqëruan edhe me pezullime nga vendi i punës.
a.ç
