Zëvendës kryeministri Erion Braçe ka prezantuar sot Artan Lamen si drejtor të Agjencisë Shtetërore të Kadastrës. Ai deklaroi gjatë prezantimit se objektivi i qeverisë është zgjidhja e problemeve me pronat dhe certifikimi i tyre.
Braçe tha se është bërë një punë e mirë me legalizimet por edhe një betejë që do vazhdojë.
“Certifikimi i pronave është prioritet i qeverisë. Kemi bërë një punë shumë të mirë me legalizimet. Është një betejë që do vazhdojë për të përfunduar procesin e legalizimi të objekteve të paligjshme kudo që ndodhen, në periferi apo zona të populluara dhe ajo përvojë duhet të shërbejë për të çuar para proceset që kemi nisur.
Dua të falënderoj zotin Lame dhe të gjithë kontributorët e tjerë. Dua të falënderoj edhe të gjithë drejtuesit e deri sotëm të ZRPP që kanë përballuar një fluks të jashtëzakonshëm në punë për certifikimin e pronave të qytetarëve të Republikës së Shqipërisë. Qoftë ato nga procesi i legalizimeve qofshin toka bujqësore”, deklaroi Braçe.
Ai tha se do ta ndjekë personalisht jo vetëm mbarëvajtjen e këtij institucioni por të gjithë koordinimin me institucionet e tjera.
“Ky proces nuk do të ketë sukses nëse nuk do të ketë bashkëpunim me gjithë aktorët. Bëj një apel, besoj që duhet ta kenë në vëmendje, bashkitë kanë marrë atribute të qenësishme, edhe për legalizimin dhe certifikimin e titujve të pronësisë, janë bashkitë që duhet të cojnë procesin përpara, të jenë të interesuara që procesi të përfundojë sa më parë të jetë e mundur. Dua të bëj apel edhe për agjencitë e tjera, apel edhe banorëve, kërkoni shërbim, mos paguani asgjë që nesër mund tu kthehet në të kundërt, vepër penale edhe për nëpunësit edhe për ata që mendon se mund ta blejë shërbimin mes parave, do ta luftojmë korrupsionin”- tha ai.
Ndërsa drejtori i Agjencisë së Kadastrës Artan Lame gjatë fjalës së tij bëri me dije tre drejtimet e kësaj reforme.
“Kadastra do marrë përsipër disa shërbime. Barra është e jashtëzakonshme po kjo është rruga e vetme për të zgjidhur problemet e tre dekadave për pronat. Reforma do jetë në drejtime
-hartografi
-shërbime
-meritokraci
Vetëm bashke mund ta ndërmarrim këtë reformë dhe vetëm bashkë do t’ia dalim”, tha Lame.
g.kosovari
