Në studion e emisionit “Trialog” në RTSH1, analisti dhe një nga themeluesit e PD, Preç Zogaj bëri një vlerësim reflektiv mbi rrugëtimin e Shqipërisë pas vitit 1990.
Ai theksoi se idealet e dhjetorit, që synonin kthimin e vendit drejt Perëndimit dhe respektimin e lirisë dhe të drejtave njerëzore, janë realizuar pjesërisht.
“Impresioni im po ti kthehem atyre viteve, ne u futëm për një qëllim jo për një trill. Kishim një projekt të rrumbullakosur akoma të pa detajuar por projekti ishte Shqipëria demokratike evropiane. Parë nga këndvështrimi i atyre viteve Shqipëria është përpara ëndrrave të dhjetorit, kam një mendim ndryshe nga shumë të tjerë që thonë se idealet e dhjetorit u ndryshuan, u tradhtuan. Ideali i parë ishte kthimi i Shqipërisë me drejtim nga perëndimi dhe kjo ndodhi. Një Shqipëri ku zbatohen liritë dhe të drejtat njerëzore që i kishte i gjithë perëndimi, e drejta e pronës, e drejta e lëvizjes, e drejta fjalës etj. Edhe kjo ndodhi. Në aspektin e projektit makro, Shqipëria është përpara”, u shpreh Zogaj.
Megjithatë, ai vuri në dukje se Shqipëria mbetet pas standardeve demokratike të vendeve perëndimore, veçanërisht në ndërtimin e institucioneve funksionale.
“Shqipëria është përpara dhjetorit 1990 por është prapa kohës. Shqipëria mund të kishte qenë shumë më mirë nëse do ndiqte disa standarde demokratike siç i ka perëndimi. Të ndërtosh institucione mbi ligje të shëndosha që zbatohen. Shqipëria ka dështuar në ngritjen e institucioneve funksionale demokratike. Partitë janë institucione të shenjta në demokraci, kjo është demokracia në të kundërt do të ishte kaos. Fillimet ishin të pastra, të drejta, kishte shumë entuziazëm, kishte idealizëm, kishte njerëz që e kishin pasur ëndërr këtë gjë’, tha ai.
Zogaj riktheu vëmendjen te fillimet e pastra dhe entuziazmi i radhëve të para të demokracisë në vend.
Ai përfundoi duke nënvizuar rëndësinë e përgatitjes së përgjithshme dhe zbatimit të ligjit si element kyç për avancimin e demokracisë shqiptare.
“Unë mendoj se ka iluminim vet ideja se do ta kthejmë Shqipërinë me fytyrë nga perëndimi, lajtmotivi pastaj bëhet program. Kishte dhe program dhe mund të them PD kishte program dhe statut, kishte vizion demokratik për ndërtimin e partisë por ky vizion që ishte dhe i shkruar u shkel vet statuti mbi të cilin u themelua partia. Kishim një përgatitje të përgjithshme për sa i përket orientimit, në radhët tona kishim dhe ekspert që kishin njohuri për ligjin, për ekonominë”, theksoi Zogaj.
