Operacioni i bujshëm për kapjen e Nicolás Maduros dhe dërgimin e tij në SHBA ishte tema qendrore e emisionit “Trialog” në RTSH, nën drejtimin e gazetares Alba Alishani. Analisti i njohur Preç Zogaj, i ftuar në studio, zbërtheu dritëhijet e këtij aksioni, duke vënë në peshore sovranitetin përballë krimit ndërkombëtar.
Sipas Zogajt, ndonëse ndërhyrja e jashtme për rrëzimin e një lideri krijon shqetësim për precedentin që vendos në të drejtën ndërkombëtare, në rastin konkret ka një përligjje të fortë: droga.
“Tramp luftën kundër drogës e ka një përparësi. Vërshimi i drogës nga Venezuela dhe vende të tjera shihet si një përligjje për këtë veprim,” theksoi Zogaj.
“I shpëtuar” nga prangat
Një këndvështrim që solli analisti ishte ai i sigurisë fizike të diktatorit. Sipas Zogajt, paradoksalisht, arrestimi nga amerikanët mund t’i ketë shpëtuar jetën Maduros.
“50 milionë dollarët (shpërblimi për kapjen e tij) mund t’i merrnin kokën Maduros. Ndërkohë që tani ai mund të quhet i shpëtuar sepse do të gjykohet në një vend të lirë,” arsyetoi Zogaj, duke iu referuar faktit se gjuetia për shpërblimin mund të kishte përfunduar me eliminimin e tij fizik.
Tani, ai përballet me drejtësinë në SHBA, ku akuzat bazohen në dëshmi të ish-bashkëpunëtorëve të tij.
Pse SHBA ndërhyri te Maduro dhe jo te autokratë të tjerë? Zogaj bëri një dallim thelbësor midis natyrës së regjimit në Venezuelë dhe atij në Rusi apo Kinë.
“Autokratë në Kinë e Rusi janë zgjedhur sipas ligjit të tyre. Në rastin e Venezuelës pretendohet se është vend demokratik, por aty janë dhunuar zgjedhjet e lira,” tha ai.
Zogaj solli në vëmendje rezultatin e zgjedhjeve të fundit, ku opozita vlerësohet të ketë fituar rreth 70% të votave, fakt që e bën Maduron një president të paligjshëm edhe sipas vetë standardeve që vendi i tij pretendon se respekton.
Kjo mungesë legjitimiteti, sipas tij, e kombinuar me akuzat për narko-trafik, krijoi terrenin për ndërhyrjen amerikane.
