Gjatë intervistës në “Këndin e Ekselencës”, Preç Zogaj la të kuptohej se ka një krisje në marrëdhëniet e tij me Lulzim Bashën.
Zogaj theksoi se Basha duhej të dorëhiqej pas humbjes në zgjedhje dhe më pas të rikandidonte, ndërsa e konsideroi të nevojshme shtyrjen e zgjedhjeve në PD.
Ish-kandidati për deputet në Lezhe deklaroi se Lulzim Basha e personalizoi fushatën dhe humbjen në zgjedhje nuk ka me kë ta ndajë.
“Basha duhet të kandidonte si i dorëhequr, duke ndjekur shembujt e Matteo Renzit në Itali apo Fatos Nanos në Shqipëri.
Do të doja të ishte një garë më e mirë.
Për mua do të ishte mirë të shtyhej data e zgjedhjeve dhe të mundësohej pjesëmarrja e më shumë kandidatëve në garë.
Basha ka marrë përsipër përgjegjësinë e humbjes dhe nuk ka shumë me kë ta ndajë këtë humbje.
Ai e personalizoi fushatën. Por, unë kërkoj një politikë më gjakftohtë”, tha Zogaj.
Sa u përket kritikave të Astrit Patozit, Jozefina Topallit dhe Majlinda Bregut, Zogaj tha se Basha nuk mund tu kërkojë atyre llogari përsa kohë nuk i konsideroi faktorë në zgjedhjet parlamentare.
“Nëse ti i përjashton dhe nuk u jep arsye, atëherë si pret që ata të marrin pjesë në fushatë?
Nëse këta nuk janë faktorë, atëherë nuk mund të jenë as fajtorë.
Nëse këta nuk janë faktorë, faji është i gjithi i Bashës dhe nuk ke çfarë u kërkon këtyre”, u shpreh Zogaj.
