Sërish është përfshirë nga flakët një pjesë e kompleksit të Kishës Katolike në Prizren.Kjo është hera e dytë, për një periudhë prej më pak se një muaji që ky objekt është përfshirë nga flakët.
Fotografinë e ka publikuar në profilin e tij në Facebook, Hajrulla Çeku, duke bërë kësisoj publik edhe lajmin se çfarë po ndodh aktualisht në Prizren.
“Prapë zjarr në objektin e trashëgimisë kulturore në qendrën e Prizrenit (pjesë e kompleksit të Kishës Katolike). I njëjti kishte pësu nga zjarri para 3 javësh, e në mungesë të veprimit të autoriteteve, dikush po tenton me e kry me themel punën qe i mbeti në gjysmë”, ka thënë Çeku, përcjell koha.net.
Koha.net e Koha Ditore kishte raportuar edhe më 15 mars, kur zjarri kishte përfshirë këtë objekt për herë të parë. Kishte reaguar edhe organizata EC Ma Ndryshe, duke thënë se objektet e mbrojtura të trashëgimisë kulturore brenda Qendrës Historike të Prizrenit vazhdojnë që të shkatërrohen, ndërkohë që institucionet përgjegjëse ende nuk kanë gjetur forma të përshtatshme për ruajtjen e tyre.
