Pas disa orësh përballjesh me zjarrin është aktivizuar edhe ushtria e Maqedonisë së Veriut për të ndihmuar zjarrfikësit në shuarjen e zjarrit masiv që ka përfshirë një ish-Fabrike në Tetovë, raporton Klan Macedonia.
Më herët, drejtori i Qendrës për Menaxhim me Kriza (QMK) Stojançe Angellov tha ishte kërkuar edhe ndihma e ushtrisë, për shkak se ekziston rreziku që zjarri të përhapet në objekte me lëndë të rrezikshme djegëse.
“Kemi kërkuar ndihmë edhe nga kompanitë private, por edhe nga Ushtria e Maqedonisë, pasi ka rrezik të përhapet zjarri në objekte me lëndë të rrezikshme djegëse. Kërkoj nga qytetarët dhe ju gazetarët që të largoheni nga kjo pjesë, për shkak të sigurisë suaj”, theksoi mes tjerash Angellov.
Me qëllim vënien nën kontroll të situatës, në vendngjarje shkoi edhe një helikopter nga Ministria e Punëve të Brendshme. Deri më tani raportohet për të paktën 3 persona të asfiksuar nga flakët që shpërthyen mëngjesin e kësaj të hëne, për shkaqe ende të panjohura.
/a.r
