Në të gjithë vendin ditën e sotme janë regjistruar disa vatra zjarri nga Jugu në Veri, ndërsa Emergjencat Civile kanë ndërhyrë për të neutralizuar flakët në disa raste.
Në Tiranë janë dy vatra, në Parkun Kombëtar të Malit të Dajtit dhe në Ibë, në Vlorë tre vatra; në Llogara, Tragjas dhe në Radhimë, në Maliq një vatër, Pogradec, një në Belsh ku rrezikohen banesat, një në Tepelenë dhe një në Shkopet.
Aktualisht është ndërhyrë me helikopter në malin e Dajtit, ndërsa në zonat e tjera është e pamundur për zjarrfikësen për shkak të terrenit dhe pritet ndërhyra nga ajri. Ndërsa në Pogradec një punonjës i bashkisë është plagosur pas një shpërthimi që ka ndodhur në fshatin Pojskë, teksa po punonte për shuarjen e flakëve që kishin përfshirë masivin pyjor.
Për rastet e vatrave të zjarrit kanë nisur hetimet, por në pjesën më të madhe të tyre shkak janë temperaturat e larta dhe i nxehti afrikan që ka përfshirë Shqipërinë ditët e fundit.
Zjarr në Dajt,në rrezik objekte të Luftës së II, ndërhyn helikopteri
Një sipërfaqe e madhe pyjore është përfshirë nga flakët në Parkun Kombëtar të Dajtit pasditen e sotme, ndërsa pas disa orësh ka filluar ndërhyrja me helikopter.
Shqiptarja.com siguron pamjet e zjarrit që ka përfshirë malin e Dajtit dhe ndërhyrjen me helikopter, pasi terreni është shumë i vështirë për zjarrfikësen.
Sipas Emergjencave Civile zjarri rrezikon një objekt të rëndësisë së veçantë, ku ruhen objekte të Luftës së Dytë Botërore, ndërsa edhe 60 forca të Gardës së Republikës janë në aksion për fikjen e zjarrit.
“Një zjarr i madh është aktiv në malin e Dajtit. Rrezikohet objekt i rëndësisë së veçantë. 60 forca të Gardës së Republikës në aksion për fikjen e zjarrit.
Po ndërhyhet edhe nga ajri me helikopter për shuarjen e zjarrit. Po shkojnë edhe forca të tjera nga Emergjencat Civile. Situata po ndiqet nga afër prej autoriteteve” thuhet në njoftimin e Ministrisë së Brendshme.
Në vend janë shënuar disa vatra zjarri pas të nxehtit afrikan, temperaturat do të vijojnë të jenë të larta gjatë këtij muaji, ndërsa sot dhe nesër pritet të arrijnë deri në 41°C.
Zjarr edhe në Ibë, kërkohet helikopteri
Pasditen e sotme është përfshirë nga flakët edhe një sipërfaqe e madhe pyjore në Ibën e Sipërme në terren të thyer.
Afër vendit të ngjarjes aktualisht ndodhet vetëm një zjarrfikëse, ndërsa e ka të pamundur ndërhyrjen, pasi terreni është i vështirë.
Për të shuar zjarrin kërkohet nga banorët ndërhyrje nga ajri, ndërsa nga të dhënat e para nuk rrezikohen banesat, por situata mund të përshkallëzohet.
Zjarr në Belsh, rrezikon banesat
Një vatër zjarri është regjistruar edhe në fshatin Seferaj në Belsh. Zjarri ka nisur në një arë e më pas ka vazhduar duke iu afruar qindra rrënjëve ullinj duke i djegur.
Mësohet se banorët kanë nisur vetë fikjen e zjarrit. Sipas dëshmive të tyre për dy orë nga rënia e zjarrit asnjë mjet zjarrfikës dhe asnjë punonjës shteti nuk ka ndërhyrë.
Ndërkohë që zjarri është shpërndarë i ndihmuar edhe nga era e fortë, shtëpitë në lagjen ‘Hysaj’ ndodhen jo shumë larg dhe rreziku pas ullinjve i kanoset këtyre shtëpive.
Pas disa orësh, Bashkia Belsh ka vendosur në dispozicion 3 fadroma dhe 40 punonjës në ullishtat e pushtuara nga flakët.
Sipas kryetarit të bashkisë Belsh Arif Tafani situata është tejet kritike. “Zjarri ka prekur rreth 60 ha, pyll vreshta dhe ullishta” shprehet ai.
Shpërthim nga zjarri në Pogradec, plagoset punonjësi
Një masiv pyjor me shkurre ka marrë flakë në fshatin Pojskë në Pogradec, ndërsa në përpjekje të për shuarjen e flakëve, një punëtor i Bashkisë Pogradec, konkretisht 57 vjeçari me inicialet A.B. është plagosur si pasojë e shpërthimit të një sendi, duke marrë dëmtime në gjymtyrët e poshtme.
57 vjeçari u transportua në Spitalin e Pogradecit, për të marrë mjekimin e nevojshëm. Ndërsa në vendngjarje kanë shkuar edhe forcat zjarrfikëse për neutralizimin e flakëve.
Vlorë, zjarr në Tragjas dhe në Radhimë
Edhe në Vlorë janë regjistruar disa vatra zjarri në Tragjas dhe Radhimë, ndërsa për shkak të terrenit zjarrfikësja e ka të pamundur për të ndërhyrë. Banorët kanë ndërhyrë për të shuar zjarrin, ndërsa aktualisht raportohet se situata është në kontroll, por flakët mund të përhapen nëse frynë erë.
Shkopet, vatra të fuqishme, terreni i vështirë
Banesa të braktisura mund të rrezikohen nga flakët në Shkopet, ndërsa janë njoftuar shërbimet e posaçme për të ndërhyrë për të shuar zjarrin. Zjarri ka përfshirë një sipërfaqe të madhe, ndërsa rrezikon lisa shumëvjeçarë.
