Provinca kanadeze Columbia British ka shpallur gjendje të jashtëzakonshme pasi një zjarr i fuqishëm , me përhapje të shpejtë shkatërroi banesa, bllokoi banorë dhe detyroi më shumë se 20 mijë persona të largoheshin nga shtëpitë e tyrë.
Kryeministri i provincës David Eby mori vendimin, teksa nga mbi 100 vatra zjarri që po digjeshin gati gjysma e tyre ishin jashtë kontrollit, për shkak të temperaturave të larta, erërave të forta dhe thatësirës së zgjatur.
I gjithë qyteti i Summerland, me rreth 12 mijë banorë, u urdhërua të evakuohej gjatë natës, së bashku me rreth 8 mijë persona në zonën e Peachland.
Autoritetet thanë se disa banorë mbetën të bllokuar dhe u desh të shpëtoheshin me helikopterë, ndërsa ekipet e kërkim shpëtimit vijuan kontrollet për persona të tjerë të mbetur pas vijës së zjarrit.
Zjarri shpërtheu të premten në mbrëmje dhe brenda pak orësh u përhap në rreth 50 kilometra katrorë, duke përparuar me shpejtësi drejt Summerland.
Pamjet e publikuara në rrjetet sociale treguan banesa të përfshira nga flakët, ndërsa banorët largoheshin mes rrugëve të rrethuara nga zjarri.
Kanadaja është përballur vitet e fundit me sezone gjithnjë e më shkatërruese zjarresh, duke shkaktuar evakuime masive dhe përhapje të tymit në zona të gjera të Kanadasë dhe SHBA-ve.
