Në emër të ushtarakëve të graduar ka përshëndetur, kolonel Petrit Çuni. Ai u shpreh se: “Është emocion i veçantë të dalësh përpara një auditori të tillë, siç është ky i sotmi. Them emocion, sepse kalon në retrospektivë një karrierë të gjatë të mbushur me ngjarje, me evente, me vështirësi, sakrifica dhe vjen tek një ditë ku merr mbrapsh atë për të cilën ke sakrifikuar, ke punuar dhe ja mbërrin ta arrish”. Ngritja në gradë, vijoi më tej kolonel Çuni, është përgjegjësi e jashtëzakonshme, pasi sfidat janë edhe më të mëdha, jo vetëm për mua, por për të gjithë ata që janë graduar në të gjitha nivelet. Gjithashtu, ai falenderoi familjen e tij për mbështetjen që i ka dhënë në këtë mision të vështirë dhe në ngjitjen e shkallëve të karrierës ushtarake.
Ministrja e Mbrojtjes, Mimi Kodheli, në fjalën e saj u shpreh se: “ky është një moment i rëndësishëm, sepse jo vetëm përcakton një hap më tej në karrierën tuaj në FA por dhe një hap vendimtar, për të cilin çdo shkallë të gradimit që perceptoni sot, tregon që dhe në një vend si ky i yni me një FA si kjo e jona, modeste në përmasa por e rëndësishme në vendimmarje, ne mund të ndryshojmë pozitivisht, ne mund të kemi transparencë, ne mund të dalim nga një proces konkurrimi dhe vlerësimi pa pasur ankesa, pretendime të nivelit që të cënojnë procesin”. Më tej ministrja Kodheli theksoi se “gjithsekush me të drejtë ka një vetëvlerësim për arritjet që ka bërë, për sakrificat që ka bërë. Por ndërkohë, momenti që ju i nënshtroheni një konkurimi dhe vlerësimi nga komisionet respektive të karrierës, e bën këtë konkurrim akoma më të ashpër, më të fortë. Dhe ata që dalin nga ky konkurrim janë akoma më shumë të përgatitur dhe të vetëdijshëm për përgjegjësitë që kanë, pasi kanë fituar në raport me kolegët e tyre”.
Në vijim zonja Kodheli nënvizoi faktin se “Ky është një proces që mund të ketë lëvizjet e veta, mund të ketë nevojë për përmirësime, por në fund të ditës unë mund të them që ne ia kemi arritur të gjithë së bashku. Ndaj të gjithë së bashku duhet që të vazhdojmë, në unitetin që na bashkon, nën drejtimin patjetër civil të një FA që vazhdon të përfaqësojë pjesën më të mirë të shoqërisë shqiptare”.
Në fund të fjalës së saj, ministrja Kodheli shprehu falenderimet e saj për të gjithë ata që i kanë mbështetur, duke filluar nga familjet e duke përfunduar te kolegët dhe te shoqëria.
Dhënia e gradave u bë në mbështetje të pikës 2 nenit 13 të ligjit 64 2014, për pushtetet dhe autoritetet e drejtimit dhe komandimit të FARSH, me propozim të Komisionit të Lartë të Karrierës (KLK) dhe Komisionit të Zakonshëm të Karrierës (KZK), Komisioni i Shqyrtimit të Ankesave (KSHA), MM dhe SHSHP promovojnë në gradë: 10 kolonelë; 17 nënkolonelë; 80 majorë; 87 kapitenë; 63 togerë; 2 kryekapterrë; 19 kapterrë; 67 rreshterë dhe 83 tetarë.
