Ambasadorja e BE-së, Romana Vlahutin deklaroi se Thethi do të jetë një nga katër zonat pjesë e programit për konkurrueshmëri, që ka të bëjë me zhvillimin e turizmit vendor.
Vlahutin ishte në Theth për t’u konsoltuar me komunitetin e për të parë çfarë është më e domosdoshme për të investuar.
“Kisha dëgjuar se sa i bukur është Thethi, por doja që të shihja edhe vetë se cilat ishin problemet në këtë zonë dhe u bë shumë e qartë që prej fillimit, që problemi më kryesor që keni këtu është rruga dhe çfarëdo dëshire që mund të ekzistojë këtu për të pasur një plan të qëndrueshëm turizmi, është pak i vështirë pa rrugën. Kështu që, çështja e infrastrukturës do të jetë e para përsa i përket asaj liste që ne do ta diskutojmë dhe me partnerë të tjerë. Një tjetër pikë është menaxhimi i burimeve që ju i keni këtu, në mënyrë që menaxhimi i burimeve të bëhet me masë dhe që të sjellë përfitimet më të mira të mundshme për banorët e kësaj zone”, tha Vlahutin./a.ç
