Vendimi i qeverisë për transferimin e Drejtorisë Arsimore Rajonale nga Shkodra drejt Lezhës ka qenë kryefjalë e dy ditëve të fundit. Lidhur me këtë ka pasur reagime të ashpra nga kryebashkiakja e Shkodrës, Voltana Ademi, për këtë arsye ministrja e Arsimit, Sportit dhe Rinisë, Besa Shahini ka sjellë argumente se përse është marrë ky vendim. Shahini është shprehur se kjo zhvendosje është bërë me qëllim që të mos ketë dy drejtori rajonale, në një qytet, nisur nga fakti që në Shkodër është vendosur Drejtoria Rajonale e shërbimeve shëndetësore.
“Themelimi i këtyre 4 drejtorive – me zyra në Lezhë, Durrës, Fier dhe Korçë – është bërë duke ndjekur modelin e Ministrisë së Shëndetësise dhe Mbrojtjes Sociale – rrjedhimisht vendimi është që mos t’i vendosim 2 drejtori rajonale në të njëjtin qytet. Për shembull, Drejtoria Rajonale e shërbimeve shëndetësore për veriun është në Shkodër, ndërsa ajo për arsimin është në Lezhë. Por Shkodra – si të gjitha bashkitë e tjera – do të ketë zyrën e saj arsimore që mbulon të gjitha shkollat e Bashkisë Shkodër. Pra ideja është që drejtoritë rajonale të shëndetësisë dhe ato të arsimit parauniversitar të jenë në qytete te ndryshme, në mënyrë që sa më shumë shërbime të jenë sa më afër qytetarëve”, tha Shahini.
Ajo ka theksuar se nuk do të ketë largime nga puna, por një riorganizim të stafit, por ka bërë të ditur, se do të ketë shkarkime të atyre drejtorëve, për të cilët ka informacione se kanë funksionuar në kundërshtim me rregullat.
“Ndërsa, lidhur me të ardhmen e punonjësve të drejtorive dhe zyrave të vjetra, nuk do të ketë pezullime nga puna, do të ketë riorganizim të stafi. Riorganizimi do të prekë edhe disa nga udhëheqësit e zyrave arsimore. Flas për ata që nuk u janë përgjigjur rregullave. Prej se kam marrë detyrën e ministres kam marrë procedurat për largimin nga puna të disa drejtuesve. Ky proces do të vazhdojë sepse ne nuk mund të lejojmë moszbatimin e rregullave”, u shpreh Shahini.
g.kosovari
