Kërkimet për 3-vjeçarin Noah Woods, i cili u zhduk nga një kënd lojërash në Brantham, Suffolk, të martën pasdite, vijojnë ende. Djali është zhdukur që prej orës 15:00 të 15 shtatorit, kur u nda nga gjyshi i tij në këndin e lojërave në Merriam Close.
Sipas informacionit të publikuar nga autoritetet angleze, Noah vrapoi në një rrugicë të ngushtë pranë këndit të lojërave, në drejtim të një kompleksi banimi të ndërtuar rishtazi, dhe nuk është parë që atëherë.
Operacioni i kërkimit vijoi gjatë gjithë natës, duke përfshirë policinë, ekipet e kërkim-shpëtimit, si dhe qindra banorë e vullnetarë. Sipas raporteve lokale, deri në 1 000 persona u mobilizuan për të ndihmuar në kërkimin e fëmijës.
Autoritetet kanë zgjeruar kërkimet në zonën e Brantham, pasi vendi ku Noah u zhduk ndodhet pranë një zone banimi, një liqeni dhe një linje hekurudhore.
Vullnetarët nga ekipi i Kërkimit dhe Shpëtimit në Suffolk Lowland përdorën një varkë për të kërkuar në liqenin Decoy, pasi morën raportime se fëmija ishte zhvendosur drejt kësaj zone. Në kërkim u përfshinë edhe ekipe me qen specialistë të policisë, ndërsa u përdorën kamera me imazhe termike për të identifikuar gjurmë të mundshme të fëmijës.
Një helikopter i rojes bregdetare po fluturonte gjithashtu mbi zonë, ndërsa ekipet e shpëtimit nga Felixstowe dhe Holbrook po ndihmonin në operacion.
Pasagjerët në trenat midis Manningtree dhe Ipswich u njoftuan se trenat do të lëviznin me shpejtësi të reduktuar për shkak të hetimit.
Policia u ka kërkuar banorëve të kontrollojnë zonat e tyre private, përfshirë kopshtet, hambarët, garazhet, ndërtesat ndihmëse dhe automjetet, për të parë nëse fëmija mund të jetë strehuar diku në zonë.
Autoritetet u kanë kërkuar gjithashtu të gjithë atyre që kanë kamera sigurie, kamera zile dere ose kamera makinash, të kontrollojnë pamjet e regjistruara nga ora 15:00 e së martës e në vijim.
Po ashtu, vullnetarëve u është kërkuar të mos pengojnë ekipet speciale që kryejnë kërkime në zona të caktuara. Siç është shpjeguar, prania masive e qytetarëve në pyje dhe zona të tjera mund ta vështirësojë përdorimin e qenve të policisë, kamerave termike dhe mjeteve të tjera, ndërsa ekziston edhe rreziku i ndryshimit të gjurmëve të mundshme.
Vullnetarëve u është kërkuar të ndjekin udhëzimet e policisë dhe, kur të vazhdojnë kërkimet, të lëvizin në çifte dhe të shmangin zonat e rrezikshme.
Sipas përshkrimit të policisë, Noah ka flokë të kuq kaçurrela dhe në momentin e zhdukjes kishte veshur një bluzë të bardhë me personazhin “Bluey”, pantallona të shkurtra dhe atlete të bardha.
Policia ka njoftuar gjithashtu se fëmija nuk flet, ka humbje të pjesshme të dëgjimit dhe po vlerësohet për autizëm. Për këtë arsye, autoritetet theksojnë rëndësinë e njoftimit të tyre menjëherë nëse dikush ka ndonjë informacion lidhur me praninë ose lëvizjet e tij.
