Presidenti i Republikës, Bajram Begaj, dekretoi 11 majin, si datë për mbajtën e zgjedhjeve të përgjithshme parlamentare të 2025.
Gazetari Artur Nura, i ftuar në “Ora e Fundit” tha se në zgjedhjet e ardhshme pritet një betejë politike, por pa ndonjë surprizë për ndryshim të hartave të pushtetit. Ai pohoi se Sali Berisha është PD dhe të gjithë janë në funksion të qëllimeve të tij.
“Do të kemi betejë politike, por nuk besoj se do kemi ndryshim hartash pushteti në raport me Partinë Demokratike. PD është Berisha dhe Berisha është PD. Kur ju i referoheni autoriteteve të dyta në PD, janë gjithmonë në funksion të Berishës”, tha ai.
Gjatë diskutimit në studio, Ibsen Elezi tha se protesta e PD dhe dalja e saj në rrugë nuk ishte mosbindje civile, siç u pretendua.
“Nuk ka pasur mosbindje civile, sepse një pjesë e caktuar ngrihet dhe proteston për një normë dhe e detyron qeverinë të tërhiqet nga diçka, por kjo nuk ka ndodhur”, u shpreh ai.
Por sa shanse ka që PD të marrë vota me Flamur Nokën dhe Gazment Bardhin, për këtë Elezi tha se këto emra i sigurojnë vetëm humbje PD pasi nuk japin asnjë lloj garancie në elektorat.
“Nuk përbejnë asnjë lloj garancie, por vetëm i humbin pikë PD, në betejë e ardhshme nuk bëhet fjalë për fitore. Synimi i Berishës nuk është të fitojë zgjedhjet, por synimi kryesor është mbijetesa politike.”, tha ai.
/a.r
