Nga Mero Baze
Problemi kryesor që i hapi shkarkimi i Veliajt opozitës ishte gjetja e një kandidati për Bashkinë e Tiranës. Por pas hedhjes së shortit në Gjykatën Kushtetuese, opozita ngjan më e qetë.
Meqë çështjen e tij në Gjykatën Kushtetuese do ta relatojë gjyqtarja Sonila Bejtja, opozita ka në dorë së paku mekanizmin e kohës se kur do ta gjykojë. Ky është problem serioz pasi shkarkimi i gjeti në befasi dhe nuk gjejnë dot kandidat.
Çdo opozitë normalisht gëzohet kur i vjen një sebep për zgjedhje, këta tanët u përleshën me njëri-tjetrin dhe filluan të zihen e shahen se si duhet të jetë kandidati përballë Manastirliut.
Tani ky debat do fillojë të bjerë, pasi gjyqtarja e çështjes mund t’ua shtyjë çështjen aq sa kohë u duhet për ta gjetur një kandidat të ri. Kur ta gjejnë mund ta njoftojnë dhe ajo fillon gjyqin.
Vendimi i gjyqit nuk ka rëndësi as për Veliaj. Varet si i duhet PD-së. Vetë Veliajt nuk i intereson nëse shkarkohet nga Gjykata apo jo, por i intereson të bëhet gjyqi sa më shpejt që ta çojë në Strasburg. Çfarëdo vendimi që të marrë gjykata, përveç vonesës në kohë, ai e ka në favor.
Duke e çuar çështjen në Gjykatën Kushtetuese, ai përveçse certifikon parregullsitë në procesin ndaj tij, forcon edhe garancitë juridike për çdo kryebashkiak nëse gjendet në pozita të tilla, duke krijuar një standard verifikimi gjyqësor të procedurës.
Veliaj nuk e ka problemin pse e shkarkoi PS, por pse është paraburgosur me akuza të montuara dhe akoma më keq, pse janë inskenuar dëshmitarë të rremë edhe kundrejt pagesave nga politikanë dhe media të PD-së, që do të turpërohen kur të bëhen publike. Shkarkimi nga PS është pasojë e një ndërhyrjeje brutale të drejtësisë në politikë, që tani më shumë se sa për Veliaj duket se ka qenë për postin e kryetarit të Bashkisë.
Socialistët janë të shqetësuar për cilësinë e vendimit të Gjykatës, por dhe për kohën kur e merr. Edhe atyre u intereson që kjo çështje të mbyllet shpejt, pasi Tiranës i duhet një kryebashkiak i ri. Natyrisht atyre u intereson edhe që gjykata ta çertifikojë shkarkimin, ndryshe nuk ja vlejti beteja. Por kjo varet se sa e lirë është Gjykata Kushtetuese të marrë vendime si e pavarur.
Ka pak gjasa që Gjykata Kushtetuese, siç ka dëshmuar në disa votime të fundit, të tregohet e pavarur nga SPAK. Vetëm nëse u ikën frika meqë po largohet Dumani. Ata kanë provuar se i kanë kthyer vendimet gjatë rrugës nga presionet e SPAK-ut apo ndërhyrjeve politike.
Ndaj dhe në këtë rast, nuk do të jetë betejë për drejtësi, por betejë politike në Gjykatë Kushtetuese. Nëse PD nuk gjen dot kandidat dhe i hapen telashe nga zgjedhjet, mos u çudisni që të lënë në postin e kryetarit Veliajn. Nëse e kanë gjetur, mund ta shkarkojnë. Ose nëse kanë shpresë se mund ta gjejnë rrugës, mund ta shtyjnë dhe pak vendimin për nga pranvera.
Kështu që mos hidhni bast se kur do bëhen zgjedhjet në Tiranë. Nëse PD e gjenë shpejt kandidatin, mund të bëhen që në vjeshtë. Nëse nuk e gjejnë, mund të bëhen në pranverë. Nëse nuk gjejnë fare, mbetet Veliaj nga burgu deri më 2027.
