Sekretari i Shtetit të Xhorxhias, Brad Raffensperger, deklaroi se kërcënimet për bombë ndaj disa qendrave të votimit këtë mëngjes ishin të pabaza. Gjatë një konference për shtyp, Raffensperger tha se kërcënimet kishin origjinë ruse. Ai theksoi se autoritetet kanë arritur të identifikojnë burimin e këtyre kërcënimeve çdo herë dhe se qëllimi i tyre kryesor është destabilizimi i Amerikës.
Më herët u raportua se pesë kërcënime të ndryshme ishin bërë në lidhje me disa qendra votimi në qarkun Fulton. Dy nga këto qendra u evakuuan si masë paraprake, por të gjitha janë rihapur dhe procesi i votimit po vijon normalisht. Raffensperger siguroi qytetarët se autoritetet po monitorojnë me kujdes situatën për të garantuar sigurinë dhe vazhdimin e procesit zgjedhor pa pengesa.
Ndërkohë, për të njëjtën situatë ka reaguar dy herë edhe FBI, duke raportuar se dy video po i nxisnin qytetarët amerikanë të mos votonin për shkak të një kërcënimi të lartë terrorist në vendet e votimit dhe për të parandaluar një manipulim të supozuar të votave në disa shtete kryesore.
Këto video, të montuara për t’u dukur si komunikata të FBI-së ose si raportime të CBS News, synojnë të mashtrojnë publikun. FBI-ja shprehet se qëllimi i tyre është “minimi i procesit demokratik dhe ulja e besimit në sistemin zgjedhor”.
/a.r
