Floida Kërpaçi është zgjedhur të premten me 1035 vota kryetarja e re e Lëvizjes Rinore për Integrim, përmes votimit elektronik me parimin një anëtar një votë.
Përballë Floida Kërpaçit ishte kandidati tjetër i Lëvizjes Rinore për Integrim Klevi Pojana i cili mori 507 vota.
Kreu i LSI-së, Ilir Meta tha se për të nuk është e rëndësishme se kush ka qenë, është e do të jetë kreu i LRI-së, sepse, theksoi ai, fuqia e LRI-së është fryma dhe shpirti i ekipit.
Kryetarja e re, duke marrë fjalën tha se është përgjegjësi e lartë dhe emocion të jesh në krye të LRI-së. “Bashkë me Klevin dhe me çdo anëtar të LRI-së, do të arrijmë të bëjmë më shumë për të rinjtë që të kemi një Shqipëri më pozitive”, tha Kërpaçi. Bashkë me ju, iu drejtua ajo anëtarëve të këtij forumi, do të punojë për të treguar forcën e uraganit të Lëvizjes Rinore për Integrim.
Kandidati tjetër në garë, Pojana, uroi kryetaren e re, ndërsa shprehu angazhimin e tij që bashkë Floidën të punojnë për të çuar para LRI-në dhe kauzat e tjera që rinia iu ka besuar.
Lëvizja Rinore për Integrim(LRI), zhvilloi në Tiranë punimet e Konventës Kombëtare ku morën pjesë rreth 2005 delegatë anembanë vendit. Takimi i sotëm vjen pas një serie konventash lokale të organizuara në të gjithë Shqipërinë. LRI zgjodhi këtë të premte dhe Komitetin Drejtues të tij. (java / r.a)
