Më 4 shtator, Akademia e Shkencave të Shqipërisë do të zgjedhë kryetarin dhe zëvendëskryetarin e ri. E bashkë me ta edhe disa anëtarë të rregullt të Akademisë. Janë pikërisht matematikani, ak. Gudar Beqiraj për postin e kryetarit dhe arkeologu, ak. Myzafer Korkuti për atë të zv.kryetarit, që do të votohen nga Asambleja e ASH.
Nga sa shihet, nuk do të ketë një garë mes kandidatësh, por një rikonfirmim ose jo nga ana e Asamblesë e dy figurave, që edhe më herët kanë mbajtur këto poste. Duket si një këmbim vendesh me Korkutit që sot është kryetar dhe Beqirajt, që mban atë postin e zëvendëskryetarit. Sipas sekretarit të përgjithshëm të ASH, Vasil Tole, afati për paraqitjen e kandidaturave ka qenë dy javë, por nuk ka pasur kandidatura të tjera, përveç atyre të mësipërmve.
Thirrja “për pjesëmarrje në konkurrimin për kryetar të Akademisë së Shkencave” ka qenë e hapur, e publikuar edhe në faqen zyrtare të ASH, që pas mbajtjes së mbledhjes së Asamblesë të Akademisë së Shkencave të Shqipërisë, në datën 3 korrik të këtij viti.
Në lidhje me akuzat e hedhura mbi fushatën dhe mungesën e garës dhe rrotacionin mes mbajtësve të posteve, Tole u shpreh se gjithçka po kryhet sipas statutit. “Nuk bëhet fjalë për rrotacion. Kandidatët në fjalë nuk po emërohen, por do të hyjnë në votimin e Asamblesë të Akademisë së Shkencave”.
KRITERET
Në thirrjet përkatëse, mbështetur mbi ligjin “Për Akademinë e Shkencave të Republikës së Shqipërisë” dhe statutin e këtij institucioni, janë përcaktuar se ç’do të përmbajë dosja e çdo kandidati, procedurat e përzgjedhjes dhe votimit, si dhe detyrat për çdo pozicion, sipas rregullores së brendshme.
Brenda dy javëve, pra nga data 3 korrik deri më 17 korrik, që përkoi edhe një periudhë e nxehtë vere, kandidatët, të cilët duhet të jenë anëtarë të rregullt ose të përhershëm të Akademisë, duhet të paraqisnin pranë protokollit të ASH kërkesën personale për aplikim, CV, listën e punimeve, platformën për drejtimin e Akademisë së Shkencave në katër vitet e ardhshme.
Po ashtu, sekretari i përgjithshëm Tole shton se të dy kandidatët për postet përkatëse i janë nënshtruar filtrit të vërtetimit “të pastërtisë së figurës”, çka është shtuar së fundi në statutin e këtij institucioni, në bashkëpunim me Autoritetin për Informim mbi Dokumentet e ish-Sigurimit të Shtetit (“Formular Aplikimi për informim për zyrtarët përpara emërimit/zgjedhjes në poste të larta” (Sipas nenit 29, pika 1, germa gj, të ligjit nr. 45/2015 “Për të drejtën e informimit për dokumentet e ish-Sigurimit të Shtetit të Republikës Popullore Socialiste të Shqipërisë”). Mbledhja e Asamblesë për votimin e kandidaturave do të zhvillohet më 4 shtator 2017, ora 11:00, në sallën “Aleks Buda” në Akademinë e Shkencave.
PROCEDURA E PËRZGJEDHJES DHE VOTIMIT
. Kryetari i Akademisë duhet të jetë anëtar i rregullt ose i përhershëm i Akademisë.
2. Zgjedhja e tij bëhet nga Asambleja drejtpërdrejt dhe me votim të fshehtë, pa debat.
3. Quhet i zgjedhur akademiku që fiton shumicën e cilë- suar absolute (50%+1) të votave të të gjithë anëtarëve të Asamblesë.
4. Në rast se asnjë kandidat nuk fiton shumicën e cilësuar absolute të votave të anëtarëve të Asamblesë, votimi përsëritet, duke qenë kandidatë dy akademikët që kanë marrë më shumë vota.
5. Në rast se edhe në votimin e dytë asnjë nga kandidatët nuk arrin të fitojë shumicën absolute të votave, zbatohet parimi i shumicës së thjeshtë (jo më pak se 50%+1) të anëtarëve të pranishëm të Asamblesë.
6. Mandati në detyrë është 4-vjeçar dhe fillon ditën e zgjedhjes nga Asambleja. Nuk mund të kandidosh dy herë rresht për këtë pozicion.
7. Kryetari i zgjedhur i Akademisë emërohet me dekret të Presidentit të Republikës
panorama/ ma.me
