Komisioni Qendror i Zgjedhjeve(KQZ) miratoi të hënën akreditimin e vëzhguesve afatshkurtër të Asamblesë Parlamentare(AP) të OSBE-së dhe të vëzhguesve afatgjatë të Komitetit Shqiptar të Helsinkit(KShH).
Me votat e të gjithë anëtarëve, KQZ miratoi akreditimin e 49 vëzhguesve të AP-së të OSBE-së, për të monitoruar procesin zgjedhor të 25 qershorit. Asambleja Parlamentare e OSBE-së është dimensioni parlamentar i Organizatës për Siguri dhe Bashkëpunim në Evropë (OSBE) dhe detyre kryesore e kësaj organizate prej 323 anëtarësh është të përfshijë një program të gjerë të vëzhgimit të zgjedhjeve për të zhvilluar dhe forcuar demokracinë.
Gjithashtu, KQZ miratoi sot dhe akreditimin e 177 vëzhguesve afatgjatë të KShH-së, misioni i të cilit është të kontribuojë për respektimin e të drejtave të njeriut, forcimin e shtetit ligjor, si dhe zhvillimin e zgjedhjeve të lira e të ndershme, në përputhje me Kushtetutën dhe aktet ndërkombëtare.
a.ç