Specialistët për Hetimin e Narkotikëve në DVP Elbasan, në bashkëpunim me Forcën e Posaçme “Shqiponja”, finalizuan operacionin policor të koduar “Bulevardi”, duke goditur veprimtaritë kriminale në fushën e shpërndarjes së drogës.
Në flagrancë u arrestua shtetasi F. P., 37 vjeç, banues në Elbasan, i dyshuar për “Prodhim dhe shitje të narkotikëve” dhe “Prodhim, mbajtje ose shitje pa leje të armëve të ftohta”. Gjithashtu u arrestua L. Xh., 34 vjeç, banues në Elbasan, i dyshuar për “Moskallëzim krimi” dhe me precedent penal në fushën e narkotikëve.
Gjatë kontrollit të automjetit tip “Mercedes Benz” u sekuestruan lëndë narkotike kokainë dhe kanabis të ndara në doza gati për shitje, një shkop metalik, tre aparate celularë, automjeti dhe një shumë parash në euro dhe lekë.
Materialet procedurale janë kaluar në Prokurorinë pranë Gjykatës së Shkallës së Parë të Juridiksionit të Përgjithshëm Elbasan për hetime të mëtejshme.
