Deputeti i PS, Erion Braçe, ka reaguar publikisht pas lajmeve që qarkulluan në media, ku pretendohej se ai ishte “ndalur” apo përfshirë në një incident gjatë një aktiviteti të partisë.
Në një postim të drejtpërdrejtë, Braçe i mohon kategorikisht këto pretendime, duke theksuar se nuk ka pasur asnjë incident dhe se dyert e aktivitetit kanë qenë të hapura.
“S’ka pasur asnjë incident! Dyert ishin hapur; nuk hyra unë dhe nuk hyra sepse mu duk që do i bëja karshillëk partisë sime!”, shprehet ai.
Braçe thekson se nuk ka qenë kurrë pjesë e një politike përplasjeje apo konflikti brenda partisë, duke shtuar se nuk i ka bërë asnjëherë “karshillëk” Partisë Socialiste.
Ai shprehet kritik ndaj mënyrës së përhapjes së lajmeve të tilla, duke nënvizuar se nuk fajëson median, por individë brenda PS që, sipas tij, shpërndajnë informacione të pavërteta.
“E neveris këtë lloj politike – karshillëk, konflikt, sherr, fyerje, shpifje e thashetheme. Nuk i ve faj medias, por të njëjtëve në PS që shpërndajnë këto lajme!”, shkruan deputeti.
Në fund të reagimit, Braçe thekson se gjatë gjithë karrierës së tij ka ndjekur një tjetër qasje në politikë, të fokusuar te shërbimi publik dhe qytetarët.
“Prej një jete kam bërë atë politikën tjetër, që është shërbim publik, që ka në qendër njerëzit dhe shërbimin konkret për ta!”, përfundon ai.
