Deputeti demokrat Saimir Korreshi zbuloi se drejtuesit e qarqeve të PD, nuk do t’i nënshtrohen procesit të primareve. Pra, logjikisht ata do të jenë në listat për deputetët pa kaluar në primare siç do bëjë pjesa tjetër e deputetëve apo kandidatëve.
“Pavarësisht se do ketë primare, nuk e di si do bëhen, se nuk e ka të përcaktuar statuti se si bëhen. Drejtuesit e qarqeve nuk do futen në primare, me aq sa di. Ata të tjerët për ca do futen në primare”, thekson Korreshi.
Korreshi thotë se ka qenë për lista të hapura, ndërsa sa i takon primareve shprehet se koha nuk është në favorin e PD.
“Unë kam qenë për lista të hapura. Kur flitet për lista të mbyllura, varet për çfarë qarku flasim. Nëse do ishte një qark në gjithë Shqipërinë, siç kërkohej nga partitë e reja, ka disa kandidatë që po të votoheshin për kandidat, nuk i njihte njeri, krahasuar me një figurë publike. Ata si Berisha apo Rama do kishin shumë më shumë mundësi të merrnin vota në gjithë Shqipërinë. Njerëzit më të rinjtë do e kishin më të vështirë të futeshin në politikë. E rëndësishme është që të maksimizohen votat.
Në të gjitha variantet prapë do ketë pakënaqësi. Koha nuk është në favorin tonë, duhet parë mirë kryesia e Këshilli si do të veprojnë. Do ketë primare besoj. Nëse nuk vjen PD në pushet nuk kanë rëndësi ato emra, por sa e shpërblen Partinë Demokratike me pushtet. Ky vend po kërkon ndryshimin e pushtetit”, vijon Korreshi.
