Kreu i Partisë Republikane Fatmir Mediu deklaroi në “Log.” në ABC se qëndrimi për zgjedhjet e 6 Marsit sa i takon partive aleate nuk i takon kryetarëve, por bazës që prej vitesh bashkëpunon me demokratët dhe sipas tij e njohin mjaft mirë njëri tjetrin. Mediu la të nënkuptuar se në qarqe të ndryshme mund të përkrahen kandidatë të kaheve të ndryshme në bazë të mbështetjes që ata gëzojnë në bazë.
“Është më mirë që strukturat që kanë bashkëpunuar për 30 vjet me njëri tjetrin e njohin njëri tjetrin. Ata do e vendosin se kë do mbështesin. Një rrugë e tretë ishte që disa subjekte politike të dilte me kandidatët e vet. Por duke pasur parasysh atë që ndodh poshtë, duam t’i japim shansin atij kandidati që ka shansin për të fituar. Në mënyrën si po rrjedhin gjërat në një pjesë të mirë të bashkive, është e pamundur. PD duhet të jetë një”, tha Mediu.
Ai deklaroi se aleatët nuk mund të bëhen pjesë e ndarjes së opozitës pasi kanë insistuar vazhdimisht që ajo të jetë e bashkuar. Mediu theksoi se propozimi i tyre ka qenë që të dyja palët në PD të zhvillonin primare të përbashkët për të zgjedhur kandidatin më të mirë.
“Ne jemi me të gjithë anëtarët e PD që duan të fitojnë. Ajo që është e rëndësishme është se nuk mund të pranojmë që të bëhemi pjesë e ndarjes së opozitës. Kemi insistuar që të ketë një opozitë të bashkuar. Kemi edhe koshiencën si politikanë sepse kemi përgjegjësi përballë qytetarëve që qeverisen nga kjo qeveri. I kemi bërë një propozim grupit të Bashës dhe Berishës për të organizuar primare të hapura që njerëzit të zgjedhin kandidatët që do shkojnë në zgjedhje.
Ajo që është e rëndësishme është që të kishim primare ku të përfshihej gjithë opozita. Është çështja kush është kandidati për kryetar bashkie për të fituar zgjedhjet. Shkodra është e padiskutueshme. Durrësi dhe Dibra. Mënyra sip o shkohet drejt këtyre zgjedhjeve tregon një mungesë interesi për të fituar zgjedhjet. Kjo do të thotë të prishësh shtëpinë për të ndërtuar kasolle. Ne nuk kemi pse të bëhemi pjesë e ndarjes. Filozofia jonë ka qenë bashkimi i opozitës në një kandidat të vetëm”, u shpreh Mediu.
/b.h
