Kreu i Partisë Republikane Fatmir Mediu ka komentuar në një emision televiziv për procesin e zgjedhjes së Presidentit të ri. Mediu është shprehur se ka komunikuar edhe me ish-kryeministrin Sali Berisha në lidhje me zgjedhjen e Presidentit të ri.
Ai tha se i ka thënë Berishës që e gjithë Opozita të dalë me një qëndrim. Sipas Mediut duhet vlerësuar jo vetëm historiku po dhe ardhmja e PD-së e ndërtimi i partneritetit me të gjithë partnerët ndërkombëtarë.
“Ne nuk kishim asnjë formulë tjetër, përveç se të kishim një bashkëpunim elektoral. Kam kontaktuar me të gjithë aktorët dhe me Berishën për sa i përket situatës dhe problemet e ndryshme dhe ajo që unë ndaj në bindjen time personale është se PD duhet të jetë një parti unifikuar, një parti me qëndrim të saktë dhe të prerë, për sa i përket të ardhmes saj politike. E rëndësishme është që të ketë një parti demokratike të organizuar. E rëndësishme është që t’i japim qytetarëve shqiptarë një qeverisje pa probleme me autoritete të cilat mund ta ndryshojnë këtë situatë të papranueshme, të bëjnë të mundur rikthimin e shpresës në Shqipëri. Po ashtu të kenë mundësi që vlerësohet jo vetëm historiku po dhe ardhmja e PD-së dhe e opozitës shqiptare dhe për më tepër ndërtimi i partneritetit shumë të rëndësishëm më të gjithë partnerët ndërkombëtarë,”- tha Mediu ndër të tjera.
Partia Socialiste ka nisur procesin e zgjedhjes së presidentit të ri. Socialistët kanë hedhur më zarf të fshehtë tre emra të cilët mendojnë se mund të zërë vendin e Ilir Metës. Shoqëria civile i ka dërguar kandidatët e saj me e-mail. Taulant Balla, i caktuar nga Rama bashkë me Elisa Spiropalin ka zhvilluar takime me Opozitën të cilës i ka bërë thirrje të përfshihet në këtë proces. Takimet janë zhvilluar me Fatmir Mediun, Agron Dukën e Mesila Dodën. Pritet biseda me Enkelejd Alibeajn, ndërsa Sali Berisha është lënë jashtë kësaj çështjeje.
/b.h
