Agjencia Shtetërore e Kadastrës ka bërë me dije se qytetarët mund të shohin online të dhënat e pronave të tyre në zonat ku po zhvillohet Regjistrimi Fillestar.
Me pak fjalë, nëse zona juaj është në proces regjistrimi, tani mund të hyni në faqen zyrtare të ASHK-së dhe, përmes një harte interaktive, të kontrolloni si janë regjistruar të dhënat e pronës suaj. Kërkimi bëhet sipas zonës kadastrale ose emrit të pronarit.
Në hartë shfaqen të gjitha informacionet që janë mbledhur gjatë matjeve dhe verifikimeve në terren.
Dokumentet vijojnë të jenë të afishuara edhe fizikisht për 45 ditë në ambientet e njësive të vetëqeverisjes vendore. Kjo do të thotë se qytetarët kanë një afat të caktuar për të kontrolluar të dhënat.
Nëse dikush gjen gabime, pasaktësi apo ka pretendime për pronën e tij, duhet të paraqesë kërkesë me shkrim pranë pikave të afishimit publik ose në drejtorinë vendore të ASHK-së brenda afatit ligjor.
Ky është momenti kur çdo pronar duhet të verifikojë të dhënat e tij, pasi pas mbylljes së kësaj faze, regjistri kadastral konsiderohet i përfunduar për zonën përkatëse.
Regjistrimi Fillestar është procesi përmes të cilit regjistrohen për herë të parë të gjitha pronat në një zonë të caktuar, duke krijuar regjistrin zyrtar të tyre.
Njoftimi i plotë i Agjencisë Shtetërore të Kadastrës
“Transparencë më e madhe dhe akses më i lehtë për qytetarët. Agjencia Shtetërore e Kadastrës bën me dije se zonat kadastrale ku po zhvillohet Regjistrimi Fillestar dhe për të cilat ka nisur Afishimi Publik, tashmë mund të konsultohen edhe online në faqen zyrtare të institucionit. Përmes hartës interaktive, qytetarët mund të shohin të dhënat e pasurive të evidentuara gjatë procesit të matjes dhe verifikimit në terren. Sistemi lejon kërkimin sipas zonës kadastrale dhe emrit të subjektit, duke shfaqur të gjitha të dhënat e pasqyruara për pasurinë përkatëse. Ndërkohë, dokumentacioni vijon të jetë i afishuar fizikisht për një periudhë 45-ditore në ambientet e vëna në dispozicion nga njësitë e vetëqeverisjes vendore përkatëse, në përputhje me kuadrin ligjor në fuqi. Gjatë kësaj faze, çdo qytetar që konstaton pasaktësi, ka pretendime apo kërkon korrigjim të të dhënave, duhet të ndjekë procedurën zyrtare përmes paraqitjes së kërkesës me shkrim pranë pikave të afishimit publik ose pranë drejtorisë vendore të ASHK-së përkatëse, brenda afatit ligjor të përcaktuar. Afishimi Publik është një moment kyç i Regjistrimit Fillestar — një fazë që garanton transparencë, përfshirje të qytetarëve dhe saktësi të regjistrit kadastral përpara përmbylljes së procesit”
